ბათუმელ მედროშეს, თემურ ქათამაძეს [გაფფარ ილმაზი] საქართველოდან გააძევებენ. სააპელაციო სასამართლომ მას ლტოლვილის, ან ჰუმანიტარული სტატუსის მინიჭებაზე საბოლოოდ უარი უთხრა.

თემურ ქათამაძის უფლებადამცველი, მარიამ გაბროშვილის თქმით, სასამართლოს უარი ლტოლვილის, ან ჰუმანიტარული სტატუსის მინიჭებაზე. ამის შემდეგ დაიწყება მისი ქვეყნიდან გაძევების პროცედურა.

"თემურ ქათამაძეს სასამართლომ საბოლოოდ უარი უთხრა ლტოლვილის, ან ჰუმანიტარული სტატუსის მინიჭებაზე. ეს იქნებოდა სამართლებრივი საფუძველი იმისთვის, რომ ის ქვეყანაში დარჩენილიყო… დაიწყება გაძევების პროცედურა", – უთხრა ბათუმელებს მარიამ გაბროშვილმა.

მას შემდეგ, რაც თურქეთის მოქალაქეს და ქართველი მუჰაჯირების შთამომავალს – თემურ ქათამაძეს საქართველოს მოქალაქეობის მინიჭებაზე, ასევე ბინადრობაზე უარი უთხრეს, ბათუმის საპროტესტო აქციების ცნობილმა მედროშემ საქართველოში ლტოლვილის, ან ჰუმანიტარული სტატუსის მინიჭება მოითხოვა.

საემიგრაციო პატიმრობაში მყოფი თემურ ქათამაძე 16 აპრილს ითხოვდა, რომ 3 საათით საპატიმროდან თბილისის ცენტრში გასვლის უფლება მიეცათ, რომ საცოლეზე რელიგიური წესით ქორწინება შესძლებოდა.

წერილში, რომელიც მისმა უფლებების დამცველმა ორგანიზაცია "საია"-მ გაავრცელა, ქათამაძე წერს, რომ 2023 წლიდან თურქეთში მისი დაკავების ორდერია გაცემული.

"თურქეთში გაძევების შემთხვევაში იქ დაპატიმრება და ციხე მელოდება. ამ რეალობიდან გამომდინარე, 5 წელია მყავს საცოლე ნონა კაკულია, ამიტომ, თურქეთში გაძევებამდე, ნონა კაკულიასთან რელიგიური წესით ქორწინების დიდი სურვილი მაქვს. ჩემი თურქეთში გაძევების შემდეგ, დიდი ალბათობით, აღნიშნულის შანსი აღარ გვექნება. სამწუხაროდ, აღნიშნული რიტუალის მიგრაციის ცენტრში ჩატარების საშუალება, მიგრაციის ადმინისტრაციამ არ მოგვცა.

უცხოელთა და მოქალაქეობის არ მქონე პირების სამართლებრივი მდგომარეობის შესახებ საქართველოს კანონის 36-ე მუხლის საფუძვლით, თავშესაფრის მაძიებელი სტატუსის მქონე ეთნიკური ქართველის სახით, თქვენი სასამართლოსგან ვითხოვ, ჩემ საცოლესთან რელიგიური წესით ქორწინებისთვის, მომავალ ერთ სასურველ დღეს, მხოლოდ 3 საათით მიგრაციის ცენტრიდან ქალაქ თბილისში გასვლის უფლებას, აღნიშნული რიტუალის შესაბამის ეკლესიაში და მეჩეთში ჩატარებისთვის" — წერდა თემურ ქათამაძე.

მანამდე, 21 მარტს, თემურ ქათამაძემ საქართველოს მე-5 პრეზიდენტს, სალომე ზურაბიშვილს მიმართა, რომ საფრანგეთის პრეზიდენტ, ემანუელ მაკრონთან ეშუამდგომლა, რომ საფრანგეთის მოქალაქეობა მიეღო.

თემურ ქათამაძე: "ვთხოვ სალომე ზურაბიშვილს, საფრანგეთის პრეზიდენტ მაკრონს ჩემთვის თავშესაფრის სტატუსი ან მოქალაქეობის მინიჭება სთხოვოს"

ბათუმელების ცნობით, თემურ ქათამაძე თურქეთში გარკვეულ იურიდიულ და სათარჯიმნო მომსახურებას უწევდა ფეტულა გიულენის ჯგუფის წევრებს და მას თურქეთში დაბრუნების შემთხვევაში უკანონო პატიმრობა ემუქრება.

თემურ ქათამაძე ბათუმის პოლიციის სამმართველოსთან 11 იანვარს დააკავე. მან პროტესტის ნიშნად, 48 დღე იშიმშილა. დაკავების დროს, როგორც ქათამაძე ამბობდა, რომ მასზე ფიზიკურად იძალადა ბათუმის პოლიციის უფროსმა ირაკლი დგებუაძემ.

თემურ ქათამაძე ათ წელზე მეტია საქართველოში ცხოვრობს და მოქალაქეობის მინიჭებაზე არაერთხელ მიმართა საქართველოს ხელისუფლებას, თუმცა უარი მიიღო.

მეტი თემურ ქათამაძის შესახებ: