"ადამიანის უფლებათა ცენტრი" დირექტორის, ალეკო ცქიტიშვილის საცხოვრებელ სახლში ჩხრეკა ცოტა ხნის წინ დასრულდა. პროკურატურის წარმომადგენლებმა მისი სახლიდან წაიღეს მობილური ტელეფონი და ლეპტოპი.

"8 საათზე გამოვედი სახლიდან, მივდიოდი ოფისში, ავტობუსში ავედი, ცოტა მეჩქარებოდა, ავტობუსზე რომ არ დამეგვიანა. სავარაუდოდ, გამომყვნენ სირბილით, ამოვიდნენ ავტობუსში, ავტობუსიდან ჩამომიყვანეს, პირადი ჩხრეკა ჩატარდა ქუჩაში, გამაცნეს მოსამართლის განჩინება, შემდეგ ამ ჩხრეკის დასრულების შემდეგ, ამოიღეს მობილური ტელეფონი და შემდეგ გამაცნეს მეორე განჩინება, რომელიც ეხებოდა სახლის ჩხრეკას. აქვე გაჩერებიდან მოვედით და სახლიც გაჩხრიკეს. ძირითადად პრეტენზია ამ ჩხრეკის პროცედურასთან არ მაქვს. თუმცა, მთავარი პრეტენზია რაც გვაქვს უფლებადამცველ ორგანიზაციებს არის ის, რომ საქმე არის უკანონო, რაც დაწყებულია თბილისის ადამიანთა უფლებათა სახლის წინააღმდეგ. მე ვარ სახლის გამგეობის წევრი, ცენტრის ხელმძღვანელი და სავარაუდოდ ამ საქმიანობასთან მიმდინარეობს ეს რეპრესიები, ეს გაგრძელდება. თუმცა, არავის ეშინია რეჟიმის, ჩვენი ბრძოლა რუსული რეჟიმის წინააღმდეგ გრძელდება და ველოდებით დამატებით რეპრესიებს.

მე როგორც გამაცნეს, 318-ე მუხლი არის სახელმწიფოს წინააღმდეგ ჩადენილი დანაშაული, სავარაუდოდ, როგორც თვითონ ამბობენ და ამასთან დაკავშირებით ჩაატარეს ეს ჩხრეკა", — აცხადებს ჩხრეკის დასრულების შემდეგ ალეკო ცქიტიშვილი.

ამას გარდა, დღეს დილიდან პროკურატურა ნანუკა ჟორჟოლიანის, ფონდ სირცხვილიას დამფუძნებლის, მარიამ ბაჯელიძის და აქტივისტ მარიამ გეგუჩაძის სახლებში შევიდა ჩხრეკის ჩასატარებლად. სამართალდამცავებმა უკვე დატოვეს მარიამ ბაჯელიძის და მარიამ გეგუჩაძის სახლები. ჩხრეკები გრძელდება ნანუკა ჟორჟოლიანის სახლში.