ე.წ. "ფონდების საქმეზე" მიმდინარე გამოძიების ფარგლებში ჩატარებული ჩხრეკებს საქართველოს სახალხო დამცველი ლევან იოსელიანი ეხმაურება.

მისი თქმით, საგამოძიებო მოქმედებების წარმართვისას ყველა შესაძლო ღონისძიება უნდა იქნას გატარებული არასრულწლოვანებისთვის ზიანის მიყენების თავიდან ასაცილებლად.

შეგახსენებთ, რომ მოძრაობა სირცხვილიას დამფუძნებლის, მარიამ ბაჯელიძის სახლში პროკურატურის მიერ ჩატარებული ჩხრეკისას სახლში იმყოფებოდა მარიამ ბაჯელიძის მცირეწლოვანი შვილი, თავად მარიამ ბაჯელიძე კი ორსულადაა.

"ხაზგასმით უნდა აღინიშნოს, რომ საგამოძიებო მოქმედებების წარმართვისას ყველა შესაძლო ღონისძიება უნდა იქნას გატარებული არასრულწლოვანებისთვის ზიანის მიყენების თავიდან ასაცილებლად. რა მიზნითაც სამართალდამცავი უწყება ვალდებულია, წინასწარ შეაფასოს ვითარება და არასრულწლოვანს შეუქმნას უსაფრთხო გარემო. ხოლო, წინასწარ გათვალისწინების შეუძლებლობის შემთხვევაში, არასრულწლოვანი დროულად განარიდოს მიმდინარე პროცესებს, მისი ოჯახის წევრის, ახლობლის ან სანდო პირის ჩართულობით, აღნიშნულის შეუძლებლობის შემთხვევაში, უზრუნველყოს სოციალური მუშაკის და ფსიქოლოგის ჩართვა.

სახალხო დამცველი შეისწავლის აღნიშნულ ფაქტებს და ექნება ყველა შესაბამისი რეაგირება, უფლებამოსილების ფარგლებში", — ნათქვამია სახალხო დამცველის აპარატის მიერ გავრცელებულ ინფორმაციაში.