ლეიბორისტული პარტიის ერთ–ერთ ლიდერსა და ეკოლოგს, ლაშა ჩხარტიშვილს სასამართლოდან დაუკავშირდნენ და კიდევ ერთი სასამართლო პროცესი 6 მაისს ჩაუნიშნეს. 23 აპრილის პროცესზე, რუსთაველის გამზირზე მიმდინარე აქციებზე გზის გადაკეტვისთვის შსს-მ მისი პატიმრობის შუამდგომლობით სასამართლოს მიმართა.

ლაშა ჩხარტიშვილის ინფორმაციით, "30 აპრილს ის შესაძლოა პოლიტიკური ნიშნით დააპატიმრონ, ამჯერად მხოლოდ და მხოლოდ რუსთაველის გამზირზე, 28 იანვრის მიმდინარე აქციაზე დგომისთვის. ამ საფუძვლიან მოლოდინს ამყარებს ის გარემოება, რომ მასთან მიმართებაში 23 აპრილს გამართულ პროცესზე, შინაგან საქმეთა სამინისტრომ, რუსთაველის გამზირზე 152 დღის განმავლობაში მიმდინარე აქციებში მონაწილეობის გამო, "დგომა–გადაკეტვისათვის" პირველად მოითხოვა ადამიანის დაპატიმრება და არა ისედაც კოლოსალური და არაადეკვატური 5000 ლარიანი ჯარიმის შეფარდება", — ნათქვამია მის მიერ გავრცელებულ ინფორმაციაში.

მისივე ინფორმაციით, ნოემბრიდან მოყოლებული, საპროტესტო აქციების დროს გზის გადაკეტვისთვის "22–ჯერ დააჯარიმეს კოლოსალური მოცულობის — 5000-ლარიანი ჯარიმით".

ლაშა ჩხარტიშვილის მიერ გავრცელებულ ინფორმაციაში ნათქვამია, რომ "ის გასულ წლებშიც პოლიტიკურ დევნას განიცდიდა, როგორც ივანიშვილის, ასევე სააკაშვილისა და შევარდნაძის რეჟიმების მხრიდან. ჯამურად ის 15–ჯერაა დაკავებული და დაპატიმრებული. მან მოახერხა და სტრასბურგის ადამიანის უფლებათა სასამართლოში 3–ჯერ გაიმარჯვა. მნიშვნელოვანია, რომ შსს–მ არც ლაშა ჩხარტიშვილის მწოლიარე ავადმყოფი დედის მდგომარეობა გაითვალისწინა, რომელიც გიორგი ახობაძის დედის მსგავსად, შეიძლება ასევე ემსხვერპლოს ივანიშვილი რუსული დიქტატურის რეჟიმის რეპრესიებს. აღსანიშნავია, რომ ასევე მომვლელის გარეშე რჩება, ჩხარტიშვილის მიერ შეფარებული ქუჩის ძაღლიც.

ლაშა ჩხარტიშვილის დაპატიმრება მიზნად ისახავს, ერთის მხრივ, პერსონალურად მისი, როგორც ერთ–ერთი ყველაზე აქტიური და მებრძოლი პოლიტიკოსის, ასევე ისედაც რეპრესირებული ლეიბორისტული პარტიის მიმართ პოლიტიკურ ანგარიშსწორებას და მეორეს მხრივ, რუსთაველის აქციების ჩახშობას, მისი მონაწილეების დაშინების მცდელობით", — ნათქვამია გავრცელებულ ინფორმაციაში.