28 აპრილს, ბათუმის საქალაქო სასამართლოში აჭარის პოლიციის დეპარტამენტის ყოფილი უფროსი გრიგოლ ბესელია მზია ამაღლობელის საქმეზე მოწმის სახით იკითხება.

ბესელიამ პროცესზე გაიხსენა 11 იანვრის, მზია ამაღლობელის დაკავების, ღამე. აჭარის პოლიციის დეპარტამენტის ყოფილი უფროსის განცხადებით, ნოემბერ-დეკემბერში მიმდინარე საპროტესტო აქციების მონაწილეებსა და ორგანიზატორებთან პოლიციას "იმდენად კარგი ურთიერთობა ჰქონდა, რომ ლამის დანათესავდნენ". ბესელიამ ასევე დასძინა რომ, თბილისისგან განსხვავებით, ბათუმში აქციის მონაწილეებსა და პოლიციელებს შორის "სულ სხვა ურთიერთობა იყო".

"გახლდით აჭარის პოლიციის დეპარტამენტის დირექტორი. 2024 წლის ნოემბრიდან დაიწყო აქციები აჭარის რეგიონში, მშვიდ ვითარებაში, რამდენიმე ადმინისტრაციული დარღვევა მოხდა ნოემბრიდან მოყოლებული დეკემბრის ბოლომდე, იანვრის დასაწყისამდე. ვეხმარებოდით აქციის ორგანიზატორებს აქციის მსვლელობის დროს, კომუნიკაცია გვქონდა ყველასთან. პირადი ურთიერთობები ისე ჩამოგვიყალიბდა, ვხუმრობდით ხოლმე, ლამისაა დავნათესავდით, ისე ვიყავით. იმისდა მიუხედავად, რომ თბილისში, დედაქალაქში ცოტა სხვა ურთიერთობა იყო პოლიციელებსა და აქციის მონაწილეებს შორის, აქ სულ სხვა ურთიერთობა გვქონდა. არანაირი დაძაბულობა არ ყოფილა არასდროს.

ვინაიდან კარგი ურთიერთობა გვქონდა აქციის მონაწილეებთან, მოდიოდნენ, აქციის მონაწილეები, ორგანიზატორები, არასამთავრობო ორგანიზაციების წარმომადგენლები, პარტიის ლიდერებიც და გვეუბნებოდნენ, რომ ამ კარგი ურთიერთობის გამო განიცდიდნენ ბულინგს, ზეწოლას თუ რატომ იყო ბათუმში ასეთი კარგი სიტუაცია. ბოლოს რომ მოდიოდნენ, აქციებზე გამარჯობასაც აღარ გვეუბნებოდნენ. ვიღაც დაგვინახავს და ცუდად აღიქვამს ამ ურთიერთობასო, ასე გაგრძელდა, ეს იანვრის დასაწყისში ხდება," — განაცხადა გრიგოლ ბესელიამ.

შემდეგ ბესელიამ მზია ამაღლობელის სილის გაწვნის ინციდენტზე ისაუბრა და განაცხადა, რომ გაკვირვებული იყო მზია ამაღლობელის "აგრესიით". ბესელიას თქმით, აჭარაში არ არიან მიჩვეულები "ასეთ აგრესიულ დამოკიდებულებას ქალებისგან".

"აგრესიული იყო [მზია ამაღლობელი ირაკლი დგებუაძესთან] და ჩემთვის ძალიან გასაკვირი იყო, იმიტომ, რომ არ ვართ პოლიციელები ქალებისგან, მით უმეტეს, აჭარაში, ასეთ აგრესიულ დამოკიდებულებებს. იმ დღეს მოხდა ქალბატონი ციალას დაკავებაც და კიდევ ერთი მანდილოსნის, სახელები და გვარები აღარ მახსოვს იმ ბავშვების. ნაკლებად მქონდა მათთან შეხება. ე.ი. იმდენად იყვნენ მოწადინებულები იმ დღეს რომ „დაკავებულიყვნენ“, რომ მანამდე, ადმინისტრაციული დაკავების დროს, როდესაც მივიღეთ გადაწყვეტილება, რომ გაგვეთავისუფლებინა და არ შეგვესახლებინა დროებითი დაკავების იზოლატორში, უარს აცხადებდნენ გათავისუფლებაზე. არ უნდოდათ რომ გასულიყვნენ," — განაცხადა ბესელია.

ბესელიამ აგრესიულობით გამოარჩია ასევე გამოცემა ბათუმელების რედაქტორი, ეთერ თურავა. მისი თქმით, ეთერი "თავგამოდებული აგრესიით" გამოირჩეოდა. ყოფილმა სამართალდამცავმა განაცხადა, რომ ის მზია ამაღლობელს დაკავებამდე არ იცნობდა და ადგილზე მისი იდენტიფიცირება ვერ მოახდინა.

"დგებუაძე ბრუნდება, მერე ქალბატონი მზია პოლიციის ფორმაზე ქაჩავს და ხელს ურტყამს სახის არეში. მერე ხდება ქალბატონი მზიას დაკავება და ეგ იყო და ეგ მაგათ შორის. იმ წამსვე ხდება, რეაგირებაც ვერ მოვახდინე, მინდოდა რომ... ქალბატონი მზია და ქალბატონი ეთერი ერთად იდგნენ. ქალბატონ მზიას არც ვიცნობდი და შეხებაც არ მქონია მანამდე. ქალბატონი ეთერი იყო უფრო აგრესიული, მეც მქონდა კომუნიკაცია იმ დღეს და ვიცი მისი დამოკიდებულება როგორი იყო, განსაკუთრებით თავგამოდებით აგრესიულობით გამოირჩევა ხოლმე. მინდოდა რომ მიმესწრო, რომ რაღაცა არ მომხდარიყო. ის დღე იყო ჩემთვის იმის მანიშნებელი, რომ რაღაცა უნდა მომხდარიყო, იმდენად არაბუნებრივად აგრესიულები იყვნენ აქციის მონაწილეები," — თქვა ბესელიამ.

ბრალდების მხარემ ბესელიას შემდეგი კითხვა დაუსვა:

— ხმა თუ გაიგეთ [სილის გაწვნის]?

”სახეში დაარტყა ხელი [...]. ისეთი ხმა იყო დარტყმის შემდეგ, მაგ ფაქტის შემდეგ დაიშალა საერთოდ აქცია,” — თქვა აჭარის პოლიციის ყოფილმა უფროსმა, გრიგოლ ბესელიამ მზია ამაღლობელის მიერ ირაკლი დგებუაძისთვის სილის გაწვნაზე.

გრიგოლ ბესელიას დახასიათებით, მზია ამაღლობელის საქმეში "დაზარალებული" ირაკლი დგებუაძე არასდროს ყოფილა შემჩნეული ქალბატონების მიმართ ძალადობაში.

"არ არის ეს ბიჭი [ირაკლი დგებუაძე] ისეთი ადამიანი, რომელიც ქალბატონების მიმართ, ან დაკავებულების მიმართ აგრესიულობაში იყოს შემჩნეული," — განაცხადა აჭარის პოლიციის ყოფილმა უფროსმა, გრიგოლ ბესელიამ მზია ამაღლობელის სასამართლო პროცესზე.

მზია ამაღლობელის საქმის მასალები იხილეთ სრულად:

შეგახსენებთ, ბათუმელებისა და ნეტგაზეთის დამფუძნებელი, ჟურნალისტი მზია ამაღლობელი 11-12 იანვარს ორჯერ დააკავეს. პირველად სტიკერის გაკვრისთვის, რომელსაც ეწერა: "იფიცება საქართველო 15 იანვარს 15:00 საათზე". რამდენიმე საათში ჟურნალისტი გაათავისუფლეს. მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს ორ სხვა პირთან ერთად.

ამაღლობელს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს.