"უნდათ, რომ სპეცოპერაციის სახე მიიღოს ამან, რომ გამოძიება მიდის და ჯგუფი დააიდენტიფიცირეს, რომელიც ქვეყანაში საბოტაჟს აწყობს, თავიანთი ენთუზიასტებისთვის უნდათ შეკერონ საქმე", — ამის შესახებ ტვ პირველთან მოძრაობა სირცხვილიას დამფუძნებელმა მარიამ ბაჯელიძემ განაცხადა. შეგახსენებთ, რომ დღეს მის საცხოვრებელ სახლში პროკურატურა იყო შესული. ჩხრეკისას ამოიღეს მობილური ტელეფონი და ლეპტოპი.

"თავიდან ერთ-ერთმა ქალმა მითხრა, რომ იყო მეზობელი, მერე რომ ავიხედე, დავინახე რომ 3 კაცი იყო იმის გარდა და სამხრე კამერაც დავინახე, რომ ჩართული ჰქონდათ და მითხრეს, რომ კარი გამეღო აუცილებლად. რაკი ბავშვთან ერთად ვიყავი და კარის შემომტვრევის სცენები არ მჭირდებოდა, კარი გავაღე. ვკითხე, რას ეძებდნენ, რისთვის იყვნენ შემოსული, მითხრეს, რომ ელექტრონული მოწყობილობების გამო არიან შემოსული და ასევე, თუ რამე კანონსაწინააღმდეგო ნივთი მაქვს სახლში. მობილური რომ გამოვრთე მითხრეს, რომ სირცხვილიასთან კავშირში იყო ეს შემოსვლა და განმიმარტეს, რომ ერთ-ერთი იყო საბოტაჟს მუხლი, მეორე იყო უცხოეთიდან დაფინანსების მუხლი და მესამე იყო, რაც მათაც არ ჰქონდათ ინფორმაცია. მობილური რომ ჩამომართვეს და წაიღეს, მერე მეუბნებოდნენ, რომ არაფერი სანერვიულო არ არის, ახლა სახლს შემოვუვლით და წავალთ. საკმაოდ სტრესული გამოცდილება იყო და მგონია, რომ ბოლომდე თავი ვერ დავიცავი...იპოვეს დედაჩემის და ჩემი ძმის კუთვნილი ლეპტოპები და დალუქეს და წაიღეს.

საინფორმაციო ვაკუუმში აღმოვჩნდი, თვითონ მითხრეს, რომ ნანუკა ჟორჟოლიანის სახლშიც არიან შესულები, მივხვდი რომ უნდათ, რომ სპეცოპერაციის სახე მიიღოს ამან, რომ გამოძიება მიდის და ჯგუფი დააიდენტიფიცირეს, რომელიც ქვეყანაში საბოტაჟს აწყობს, თავიანთი ენთუზიასტებისთვის უნდათ შეკერონ საქმე", — ამბობს მარიმა ბაჯელიძე.

ამას გარდა, პროკურატურის თანამშრომლები ჩხრეკის ჩასატარებლად შევიდნენ: ნანა ჟორჟოლიანის, ალექსანდრე ცქიტიშვილის, ლაშა არველაძის, გუგა ხელაიას და მარიამ გეგუჩაძის სახლებში.

პროკურატურის ინფორმაციით, თბილისის საქალაქო სასამართლოს მიერ გაცემული განჩინების საფუძველზე მიმდინარეობს ფონდების ხელმძღვანელი პირების — ნანუკა ჟორჟოლიანის, ალექსანდრე ცქიტიშვილის, ლაშა არველაძის, გუგა ხელაიას და მარიამ ბაჯელიძის ფაქტობრივ და რეგისტრაციის მისამართებზე არსებული საცხოვრებელი სახლების ჩხრეკები.

შეგახსენებთ, რომ საქართველოს პროკურატურამ სოლიდარობის ფონდების საბანკო ანგარიშები 17 მარტს საზოგადოებრივი მოძრაობა "ერთიანი ნეიტრალური საქართველოს" წარმომადგენლის, ვატო შაქარიშვილის მიერ შეტანილი სარჩელის საფუძველზე დააყადაღა.