ოცნების არჩეული პრეზიდენტი მიხეილ ყაველაშვილი, ერევანში ოფიციალური ვიზიტის ფარგლებში, სომხეთის პრემიერმინისტრს, ნიკოლ ფაშინიანს შეხვდა. ამის შესახებ ინფორმაციას სოციალურ ქსელში თავად ავრცელებს.

"ვისაუბრეთ საქართველოსა და სომხეთს შორის არსებულ ნაყოფიერ თანამშრომლობაზე, მრავალწლიან კეთილმეზობლურ ურთიერთობებზე და განვიხილეთ ქვეყნებს შორის არსებულ სტრატეგიული პარტნიორობის სხვადასხვა განზომილებები.

მივესალმები სომხეთსა და აზერბაიჯანს შორის სამშვიდობო შეთანხმებაზე მოლაპარაკებების დასრულებას, რაც სამხრეთ კავკასიის რეგიონში ხანგრძლივი მშვიდობისა და სტაბილურობისკენ გადადგმული ისტორიული ნაბიჯია.

სულ ცოტა ხნის წინ, თბილისში გაიმართა სამმხრივი შეხვედრა საქართველოს, სომხეთისა და აზერბაიჯანის საგარეო საქმეთა სამინისტროებს შორის — იმედი მაქვს, რომ აღნიშნულ ფორმატში, საერთო ძალისხმევით ჩვენ შევძლებთ ნაყოფიერ თანამშრომლობას რეგიონის კეთილდღეობისთვის",— ნათქვამია გავრცელებულ ინფორმაციაში.