29 აპრილს, გვიან ღამით, ჭიათურაში დაკავებული 4 მაღაროელის დაკავებასთან დაკავშირებით, შსს განცხადებას ავრცელებს. სადაც ნათქვამია, რომ ბრალდებული მაღაროელები შუქრუთის მაღაროს დირექტორს, 1982 წელს დაბადებულ თენგო კობერიძეს ფიზიკურად დაუპირისპირდნენ და სხეულის სხვადასხვა არეში დაზიანება მიაყენეს.

"შინაგან საქმეთა სამინისტროს იმერეთის პოლიციის დეპარტამენტის, ასევე, ჭიათურისა და საჩხერის რაიონული სამმართველოების თანამშრომლებმა, ჩატარებული ოპერატიული ღონისძიებებისა და საგამოძიებო მოქმედებების შედეგად, ჯანმრთელობის განზრახ ნაკლებად მძიმე დაზიანების ბრალდებით 4 პირი - 1991 წელს დაბადებული გ.ნ., 1990 წელს დაბადებული მ.ს., 1985 წელს დაბადებული ა.ჭ. და 1989 წელს დაბადებული თ.გ. დააკავეს.
დანაშაული 6 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ ბრალდებულები ჭიათურის მუნიციპალიტეტში, შუქრუთის მაღაროს დირექტორს, 1982 წელს დაბადებულ თ.კ.-ს ფიზიკურად დაუპირისპირდნენ და სხეულის სხვადასხვა არეში დაზიანება მიაყენეს. სასწრაფო სამედიცინო დახმარების თანამშრომლებმა თ.კ. სამედიცინო დაწესებულებაში გადაიყვანეს, სადაც მას შესაბამისი სამედიცინო დახმარება გაეწია.

სამართალდამცველებმა ცხელ კვალზე ჩატარებული საგამოძიებო ღონისძიებების შედეგად ბრალდებულები დანაშაულის ჩადენიდან, რამდენიმე საათში დააკავეს.

გამოძიება სისხლის სამართლის კოდექსის 118-ე მუხლის მე-2 ნაწილით მიმდინარეობს, რაც ჯანმრთელობის განზრახ ნაკლებად მძიმე დაზიანებას გულისხმობს," — წერს შსს.

დანაშაული 6 წლამდე ვადით თავისუფლების აღკვეთას ითვალისწინებს.

ინციდენტის შემსწრე მაღაროელები საუბრისას აცხადებენ, რომ კობერიძემ პროტესტის მონაწილეებს "ნახირის ჯოგი" უწოდა, რასაც დაპირისპირება მოჰყვა.

შეგახსენებთ, რომ წუხელ, 29 აპრილის ღამეს, ჭიათურაში, საპროტესტო კარავში პოლიციამ ღამის 3:30 საათზე საპროტესტო აქციის 4 მონაწილე დააკავეს.

"მაღაროელის" გვერდზე გავრცელებულ ლაივ-ჩართვაში მაღაროელი ტარიელ მიქაცაძე აცხადებს, რომ წუხელ, ღამის 4-ის ნახევარზე შსს-მ რეიდი მოაწყო და საპროტესტო აქციის 4 მონაწილე დააკავა.

"შსს-მ წუხელ ივაჟკაცა, 4-ის ნახევარზე რეიდი მოგვიწყვეს, შემოგვიცვივდნენ კარავში მოშიმშილე ადამიანებს, თავს დაგვესხნენ. 3 ადამიანი აქედან გაიყვანს, მე პირადა მათრიეს, ტელეფონი გადამიგდეს, ხალხს ხელები გადაუგრიხეს. გაიტაცეს აქციის 3 მონაწილე, ესენი გახლავთ: გიორგი მეფარიძე, მერაბი სალარიძე და თენგიზი გველესიანი. რაც შეეხება მეოთხეს, თავს დაესხნენ ოჯახში, თავის საცხოვრებელ ბინაში ააწიოკეს მცირეწლოვანი ბავშვები და როგორც ბოროტმოქმედი დამნაშავეები ისე წაიყვანეს და როგორც ჩვენ გვაქვს ინფორმაცია, დღეს იმყოფებიან ქუთაისის წინასწარი დაკავების იზოლატორში", — აცხადებს ტარიელ მიქაცაძე.

იხილეთ ასევე:

29 აპრილის ღამეს ჭიათურაში 4 მაღაროელი დააკავეს