პროკურატურა ნანუკა ჟორჟოლიანის, ფონდ სირცხვილიას დამფუძნებლის, მარიამ ბაჯელიძის და ადამიანის უფლებათა ცენტრის ხელმძღვანელის, ალეკო ცქიტიშვილის სახლებში ჩხრეკას ატარებს.

წინააღმდეგობის მიუხედავად, ტელეფონის ამოღების მოტივით, ნანუკა ჟორჟოლიანს და მარიამ ბაჯელიძეს ლაივ-ჩართვები გაათიშვინეს. ჩვენს ხელთ არსებული ინფორმაციით, ჟორჟოლიანის სახლში უკვე მივიდა ადვოკატი გუჯა ავსაჯანიშვილი. ნანუკა ჟორჟოლიანი ახლახან ლაივში გავიდა, სადაც აცხადებს, რომ მის სახლში პროკურატურის გარდა სუს-ია შესული. ნანუკა ჟორჟოლიანი ლიავში აცხადებდა, რომ ლაივს გათიშავდა, თუ სუს-ი მის სახლს დატოვებდა. ამის შემდეგ სახელმწიფო უსაფრთხოების სამსახურის თანამშრომლებმა ჟორჟოლიანის სახლი დატოვეს.

მანამდე ნანუკა ჟორჟოლიანის ფეისბუ-გვერდზე მისი გაგზავნილი მესიჯი გავრცელდა, სადაც ნათქვამია, რომ ჩხრეკის ჩასატარებლად მოსული პოლიციელები "ჯერ საბუთებს ავსებენ და ჩხრეკას მალე დაიწყებენ". ადგილზე ჯერ არ მისულა ნანუკა ჟორჟოლიანის ადვოკატი.

"აი, რა სარგებლობა მოაქვს დილის 7 საათზე გაღვიძებას.

9 საათი არ იყო რომ მოვიდნენ.

10 კაცია. ზოგი ფორმით, ზოგი უფორმოთ

ჯერ საბუთებს ავსებენ. ჩხრეკას მალე დაიწყებენ. ამ სტატუსს სხვა წერს ჩემი გაგზავნილი მესიჯით. ტელეფონი ჩამომართვეს.

ადვოკატს ველოდები.

უკეთესი იქნებოდა საბას მოესწრო სკოლაში წასვლა.

დანარჩენი, მე რომ ამით ვერ შემაშინებენ, იცით :)

ცეცხლი ოლიგარქიას!

ცეცხლი გაბიტაშვილს :))

და რუს მთავრობას დამხობა", — ნათქვამია ნანუკა ჟორჟოლიანის ფეისბუქზე გავრცელებულ ტექსტში.

აღსანიშნავია, რომ პროკურატურის თანამშრომლების მისვლის დროს, ორსული მარიამ ბაჯელიძე მცირეწლოვან შვილთან იყოფებოდა სახლში. ის წლებია აღარ არის დაკავშირებულ ფონ სირცხვილიასთან და თავად ფონდმა მუშობა 2024 წლის სექტემბერში შეწყვიტა. მოგვიანებით, მას სამართალდამცავებმა მცირეწლოვანი ბავშვის სახლიდან გაყვანის უფლება მისცეს.

განჩინების თანახმად, რომლის საფუძველზეც პროკურატურა მარიამ ბაჯელიძის სახლში შევიდა, მითითებულია სისხლის სამართლის კოდექსის 318-ე და 319-ე მუხლები. 318-ე მუხლი გულისხმობს საბოტაჟს, 319-ე კი "უცხო ქვეყნისათვის, უცხოეთის ორგანიზაციისათვის ან უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარებას".

რაც შეეხება მესამე ჩხრეკას, პროკურატურის თანამშრომლები „ადამიანის უფლებათა ცენტრის“ ხელმძღვანელის, ალეკო ცქიტიშვილის სახლშიც შევიდნენ. IPN-ის ცნობით, ჩხრეკამდე პროკურატურის თანამშრომლებმა ალეკო ცქიტიშვილი სახლთან შეაჩერეს და პირადი ნივთები, მათ შორის ტელეფონი ჩამოართვეს, რომელიც დალუქეს.

პროკურატურის თანამშრომლებმა ცქიტიშვილს განუმარტეს, რომ ჩხრეკის პროცედურა სასამართლო განჩინების საფუძველზე ტარდება.

სავარაუდოდ, ჩხრეკა იმ ფონდების დამფუძნებლების სახლებში მიმდინარეობს, რომლებიც საპროტესტო აქციაზე დაჯარიმებული ან დაზარალებული მოქალაქეებისთვის თანხებს აგროვებდნენ. აღსანიშნავია, რომ ლაივ-ვიდეოებში პროკურატურის თანამშრომლები ჩხრეკის საფუძვლად იმ მუხლებს ასახელებენ, რომლებზეც პროკურატურამ გამოძიება ქართულ ოცნებასთან აფილირებული ნეიტრალური საქართველოს მიმართვის საფუძველზე დაიწყო. ამ ორგანიზაციის ლიდერი ვატო შაქარაშვილია.