ნანუკა ჟორჟოლიანის სახლში რამდენიმესაათიანი ჩხრეკა დასრულდა. ჟურნალისტმა მედიასთან საუბრისას განაცხადა, რომ ჩხრეკის დროს სუსი პროკურატურას მეთვალყურეობას უწევდა და მითითებებს აძლევდა. ჟორჟოლიანმა ასევე განაცხადა, რომ ჩხრეკის განჩინება პირველ აპრილს იყო გაცემული, ვადა გასდიოდა ამ ნებართვას და ის შესაბამისად გამოიყენეს.

ჟურნალისტის ახსნით, პროკურატურის წარმომადგენლებს სერიოზული რეაქცია ლაივ-ჩართვაზე ჰქონდათ. მათ არ სურდათ ლაივში დაფიქსირებულიყო, როგორ იღებდა პროკურატურა სუსისგან ჩხრეკის მიმართულებებს.

"დილის 9 საათი ჯერ არ იყო, როდესაც მივიღე შეტყობინება ჩემი ადვოკატისგან, რომელიც ასევე არის "ფროსფერითის" ადვოკატი, რომელმაც მითხრა, რომ იქ შევიდნენ ჩხრეკაზე და იცოდე, მაინც ინფორმაციას გაწოდებ. ამის შემდეგ, ჩემი შვილი წავიდა და მითხრა, რომ დაბლა ძალიან ბევრი პოლიციელი იყო და მივხვდი, რომ ჩხრეკაზე შემოდიოდნენ. ერთადერთი მინდოდა, რომ საბას სახლიდან გაესწრო, მაგრამ ვერ გაასწრო.

წინ იდგა ძალიან გამოპრანჭული პროკურორი ქალი, დილის 9 საათისთვის ზედმეტად მოწესრიგებული იყო. მასთან ერთად იყვნენ პროკურორები, რომლებსაც ეწერათ, რომ იყვნენ პროკურორები. იყო 5 ცალი, რაღაცნაირი, უფორმო პოლიციელი. საბამ ამოიცნო ერთი და მითხრა, რომ ეს არის პოლიციელიო. რომ მივხვდი უკვე ხელის მოკიდებას აპირებდნენ, რომ ტელეფონი წაერთმიათ, მე თვითონ მივეცი, საბა რახან იყო სახლში. პირველი, ყველაზე სერიოზული რეაქცია რაზეც ჰქონდათ, ეს იყო ლაივი და მე მათ ვუხსნიდი, რომ მათ მიმართ ნდომა არ მქონდა და შესაბამისად, ეს იყო ჩემი დაცვა, სანამ ადვოკატი მოვიდოდა. არც კი აპირებდნენ ჩხრეკის დაწყებას, სანამ ლაივს არ გავთიშავდი.

საინტერესო იყო სუს-ის ეპიზოდი, რადგან პროკურატურა რასაც აკეთებდა, სუსი მეთვალყურეობას ეწეოდა. ეს არის საინტერესო, რადგან იქ ნდობის ფაქტორები არის სისტემაში მორღვეული, "ოცნება" სისტემაში ერთმანეთს ნაკლებად ენდობა. პროკურატურა რომ დადიოდა, სუსი ეუბნებოდა რა უნდა ექნა. ისინი ეუბნებოდნენ, ანიშნებდნენ, ისინი იღებდნენ პირდაპირ ეთერში გარკვეულ მინიშნებებს და პროკურატურაც ამის მიხედვით მოქმედებდა. მათი მთავარი ამბავი იყო, რომ ლაივში ეს ყველაფერი არ ყოფილიყო.

ჩხრეკის განჩინება არის გაცემული პირველ აპრილს. მე რომ სამ აპრილს დავწერე სტატუსი, რომ ჩემს სახლში ჩხრეკაზე შემოდიან, ის ინფორმაცია იყო სწორი. სამართლებრივად ამიხსნეს, რომ ვადა გასდიოდა ამ ნებართვას და შესაბამისად გამოიყენეს ეს ნებართვა.

ამოიღეს ყველაფერი [კადრები] საბას ნათლობიდან დაწყებული, მარიამის დაბადების დღით დამთავრებული. ტექნიკაც ამოიღეს, ამოიღეს ისეთი ძველი ტელეფონები, რომლებიც არ ირთვება და ე.წ. ფლეშკები," — თქვა ნანუკა ჟორჟოლიანმა ჩხრეკის დასრულების შემდეგ.

ჟურნალისტი არ გამორიცხავს, რომ გასაჩერებლად პროკურატურამ ბრალი წაუყენოს, შემდეგ კი დააკავონ.

"ჯერ დაგვაყადაღეს და ამით გვითხრეს, რომ გავჩერებულიყავით. არ შევჩერდით. ახლა მეორე ეტაპი იყო ჩხრეკაზე შემოსვლა. მე ხომ არ შევჩერდები? — შემდეგი ეტაპი იქნება, ბრალს წამიყენებენ. მერე ისევ არ შევჩერდები და ბოლოს მეტყვიან, თუ არ მოისვენებთ, ბორკილებს დაგადებთო" — განაცხადა ჟორჟოლიანმა.

შეგახსენებთ, პროკურატურა ნანუკა ჟორჟოლიანის, ფონდ სირცხვილიას დამფუძნებლის, მარიამ ბაჯელიძის და ადამიანის უფლებათა ცენტრის ხელმძღვანელის, ალეკო ცქიტიშვილის სახლებში ჩხრეკა ჩაატარა.

წინააღმდეგობის მიუხედავად, ტელეფონის ამოღების მოტივით, ნანუკა ჟორჟოლიანს და მარიამ ბაჯელიძეს ლაივ-ჩართვები გაათიშვინეს. ჩვენს ხელთ არსებული ინფორმაციით, ჟორჟოლიანის სახლში უკვე მივიდა ადვოკატი გუჯა ავსაჯანიშვილი. ნანუკა ჟორჟოლიანი ახლახან ლაივში გავიდა, სადაც აცხადებს, რომ მის სახლში პროკურატურის გარდა სუს-ია შესული. ნანუკა ჟორჟოლიანი ლიავში აცხადებდა, რომ ლაივს გათიშავდა, თუ სუს-ი მის სახლს დატოვებდა. ამის შემდეგ სახელმწიფო უსაფრთხოების სამსახურის თანამშრომლებმა ჟორჟოლიანის სახლი დატოვეს.

საქართველოს პროკურატურის განცხადებით, თბილისის საქალაქო სასამართლოს მიერ გაცემული განჩინების საფუძველზე ჩატარდა ფონდების ხელმძღვანელი პირების — ნანუკა ჟორჟოლიანის, ალექსანდრე ცქიტიშვილის, ლაშა არველაძის, გუგა ხელაიას და მარიამ ბაჯელიძის ფაქტობრივ და რეგისტრაციის მისამართებზე არსებული საცხოვრებელი სახლებისა და პირადი ჩხრეკების თაობაზე.

უწყების განმარტებით, საქმე ეხება საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების, საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტებზე მიმდინარე გამოძიება.