საქართველოს მეხუთე პრეზიდენტ სალომე ზურაბიშვილის გარშემო შექმნილი "წინააღმდეგობის პლატფორმა" დღეს, ფონდების ხელმძღვანელების სახლებში ჩატარებულ ჩხრეკებთან დაკავშირებით განცხადებას ავრცელებს.

"წინააღმდეგობის პლატფორმის" შეფასებით, მომხდარი კიდევ ერთხელ ადასტურებს, თუ როგორ აწუხებს ქართულ ოცნებას მოქალაქეების პროტესტი და მათი ერთადერთი მოდუსი რეპრესიებია.

განცხადებაში ასევე საუბარია, თუ როგორ ცდილობს ქართული ოცნება თავიანთი მომხრეების დარწმუნებას, რომ ორსული ქალი მცირეწლოვანი ბავშვით საბოტაჟსა და კონსტიტუციური წყობილების წინააღმდეგ საქმიანობაში იყო ჩართული.

წინააღმდეგობის პლატფორმამ ასევე განაცხადა, რომ ისინი აგროვებენ ყველა იმ ადამიანის მონაცემს, რომლებმაც უკანონო გადაწყვეტილებები გასცეს და მის შემსრულებელ პირებს, რათა დასავლეთის ქვეყნებმა სანქციები დაუწესონ.

"დღეს რეჟიმის სამართალდამცველები პროპაგანდისტული ამოცანებისთვის ხუთი სხვადასხვა მოქალაქის სახლში შევარდნენ, რომელთა ნაწილიც იმ სამოქალაქო ფონდებთან არის კავშირში, რომლებიც მოქალაქეებს დრაკონულ ჯარიმებთან, სისხლის სამართლებრივ დევნასთან და რეჟიმის სხვა რეპრესიულ ზომებთან გამკლავებაში ეხმარებიან.

ეს კიდევ ერთი დადასტურებაა იმისა, თუ როგორ აწუხებთ მათ საქართველოს მოქალაქეების პროტესტი და რომ ქართული ოცნების მოქმედების ერთადერთი მოდუსი რეპრესიებია — ისინი ვეღარ მართავენ, მათ მხოლოდ მოქალაქეების დევნა შეუძლიათ.

ამით რეჟიმი ცდილობს საკუთარი მომხრეების დარწმუნებას, რომ ორსული ქალი მცირეწლოვანი ბავშვით საბოტაჟსა და კონსტიტუციური წყობილების წინააღმდეგ საქმიანობაში იყო ჩართული, მიტაცებული სახელმწიფოს პირობებში კი არ არსებობს ინსტიტუტი, რომელიც დაიცავს პროპაგანდისტული ამოცანებისთვის თარგეტირებულ მოქალაქეებს, მათ სიმართლეს და სამართლიანობას.

"წინააღმდეგობის პლატფორმა" იმოქმედებს საქართველოს მოქალაქეთა საუკეთესო ინტერესების გათვალისწინებით და იმ ადამიანების ანგარიშვალდებულების უზრუნველსაყოფად, რომლებმაც ამ უკანონო რეიდების დაგეგმვასა და აღსრულებაში მიიღეს მონაწილეობა.

პლატფორმა აგროვებს ყველა ამ ადამიანის მონაცემს და გააკეთებს ყველაფერს, რომ უკანონო გადაწყვეტილებების გამცემ და შემსრულებელ პირებს ჩვენი მოკავშირეების მხრიდან დაუწესდეთ სანქციები," — ნათქვამია განცხადებაში.

დღეს, 29 აპრილს პროკურატურის თანამშრომლები ჩხრეკის ჩასატარებლად შევიდნენ: ნანა ჟორჟოლიანის, ალექსანდრე ცქიტიშვილის, ლაშა არველაძის, გუგა ხელაიას და მარიამ გეგუჩაძის სახლებში.

პროკურატურის ინფორმაციით, თბილისის საქალაქო სასამართლოს მიერ გაცემული განჩინების საფუძველზე მიმდინარეობს ფონდების ხელმძღვანელი პირების ფაქტობრივ და რეგისტრაციის მისამართებზე არსებული საცხოვრებელი სახლების ჩხრეკები.

შეგახსენებთ, რომ საქართველოს პროკურატურამ სოლიდარობის ფონდების საბანკო ანგარიშები 17 მარტს საზოგადოებრივი მოძრაობა "ერთიანი ნეიტრალური საქართველოს" წარმომადგენლის, ვატო შაქარიშვილის მიერ შეტანილი სარჩელის საფუძველზე დააყადაღა.

მეტი 29 აპრილს ჩატარებულ ჩხრეკებზე: