საქართველოს უზენაესი სასამართლოს უვადო მოსამართლეობის კანდიდატი, თამარ ალანია ამბობს, 2012 წლამდე მოსამართლეებზე ზეწოლის შესახებ ამ საკითხზე გამოქვეყნებული ანგარიშებიდან სმენია. ამის შესახებ მან პარლამენტში იურიდიულ საკითხთა კომიტეტის სხდომაზე უმრავლესობის დეპუტატის, დიმიტრი ცქიტიშვილის კითხვაზე პასუხის გაცემის დროს განაცხადა.

ალანია ირწმუნება, რომ გადაწყვეტილების მიღების დროს ყოველთვის თავისუფალია:

"მე ჩემთან დაკავშირებით გეტყვით. წინა ხელისუფლების წარმომადგენლები ბრძანდებოდნენ აქ, შემიძლია მათაც ვკითხო, თუ ოდესმე ჩემ მიმართ განხორციელებულა ზეწოლა და მიმიღია გადაწყვეტილება".

დიმიტრი ცქიტიშვილის კითხვაზე, ალანიას, როგორც იუსტიციის უმაღლესი საბჭოს წევრს, აქვს თუ არა განცდა, რომ 2012 წლამდე სასამართლოზე იყო უფრო მეტი ზეწოლა, ვიდრე დღეს, კანდიდატი ასე პასუხობს:

"არსებობს ანგარიშები, სადაც ამაზე არის საუბარი... [ამ ფაქტებზე] მსმენია ამ ანგარიშებიდან, აი, ასეთი გზით".

დღეს, 23 სექტემბერს პარლამენტში უზენაესი სასამართლოს მოსამართლეობის კანდიდატების მოსმენა დაიწყო. პარლამენტში შექმნილია სამუშაო ჯგუფი, რომლის ფარგლებში გაიმართება შეხვედრა თითოეულ კანდიდატთან. ამ ეტაპზე მოსამართლეებს იურიდიულ საკითხთა კომიტეტის სხდომაზე უსმენენ.

20-კაციანი სია იუსტიციის უმაღლესმა საბჭომ 4 სექტემბერს დაამტკიცა. სიაში აღმოჩნდა ის ხუთი "სადავო" მოსამართლე, რომელიც პარლამენტში დეკემბერში წარდგენილ 10-კაციან სიაში იყო, მათ შორის, გიორგი მიქაუტაძე, ნინო ქადაგიძე, პაატა სილაგაძე, მერაბ გაბინაშვილი, თამარ ალანია. წინა სია მმართველ პარტიაში განხეთქილების, არასამთავრობოებში კი პროტესტის მიზეზი გახდა.

ამავე თემაზე: