გიორგი გახარიას განცხადების საფუძველზე ცენტრალურმა საარჩევნო კომისიამ მისი პარტიის მიერ საქართველოს პარლამენტის 2024 წლის 26 ოქტომბრის არჩევნებისთვის პარტიული სიით წარდგენილი პარლამენტის წევრობის 8 კანდიდატს რეგისტრაცია გააუქმა და პარტიული სიიდან ჩახსნა.

რეგისტრაცია გაუუქმდათ: ელგუჯა ხოკრიშვილს, კახა ნურალიძეს, ვახტანგ ფაჩულიას, ერეკლე დუმბაძეს, გოჩა ტყეშელაშვილს, კოკა კობალაძეს, ნიკოლოზ ამირხანაშვილს და ოთარ შალიკიანს.

პარტიულ სიაში გადაადგილებას გახარიას გუნდში ადასტურებენ და ამბობენ, რომ ეს თვითმმართველობის არჩევნებისთვის მზადების შემადგენელი ნაწილია. გუნდში შესაძლო დაპირისპირების შესახებ გავრცელებულ ინფორმაციას კი პარტია სიცრუეს უწოდებს.

"ჩვენ პირველივე დღიდან ვამბობთ, რომ ვემზადებით თვითმმართველობის არჩევნებისთვის. შესაბამისად, პარტიულ სიაში გადაადგილებაც დაკავშირებულია თვითმმართველობის არჩევნებთან, ნაწილი თბილისში, ნაწილი ქუთაისში და სხვა ქალაქებში იქნებიან პარტიის მაჟორიტარი კანდიდატები", — განუცხადეს პარტიაში ინტერპრესნიუსს.

ცნობისთვის, დღესვე პარტია გახარია საქართველოსთვის დეპუტატებს პარლამენტის წევრის უფლებამოსილება შეუწყდათ. სხდომების არასაპატიო მიზეზით გაცდენის საფუძვლით მანდატი შეუწყდა: გიორგი გახარიას, თეონა აქუბარდიას, ანა ბუჩუკურს, ლევან გოგიჩაიშვილს, ზაზა თავაძეს, ბექა ლილუაშვილს, ნათია მეზვრიშვილს, ბერდია სიჭინავას, კახა ქემოკლიძეს, როინ ქოჩორაშვილს, დიმიტრი ცქიტიშვილს და ზვიად ძიძიგურს.

შეგახსენებთ, რომ გახარიას გუნდი ოცნების პარლამენტთან ბოიკოტის რეჟიმში იმყოფება, თუმცა 3 ბარიერგადალახული პარტიისგან განსხვავებით სხვა ფორმა აირჩიეს — საარჩევნო სიის ჩახსნის ნაცვლად, პარტიამ უარი თქვა მხოლოდ საპარლამენტო საქმიანობაზე. ოცნების პარლამენტის დღევანდელი გადაწყვეტილების შემდეგ, ყოფილი პრემიერის გუნდს 6 თვეში ექნება შესაძლებლობა, გათავისუფლებული კვოტები კვლავ შეავსოს.

ოცნების პარლამენტის მე-11 მოწვევა 150 წევრიანი უნდა იყოს, თუმცა ამჟამად 89 დეპუტატით არის წარმოდგენილი.