ამერიკული ფეხბურთის ვარსკვლავმა და ტეილორ სვიფტის პარტნიორმა, ტრევის კელსიმ, 2023 წელს პოპულარულ კომედიურ გადაცემას Saturday Night Live-ს (SNL) უმასპინძლა. ყოველკვირეული შოუ, რომელიც ყოველ ჯერზე სხვადასხვა ცნობილ ადამიანს მიჰყავს, მასპინძლის მონოლოგით იხსნება, შემდეგ კი მაყურებელს სკეტჩებს წარუდგენენ ხოლმე. თითოეულ ეპიზოდზე უამრავი სცენარისტი მუშაობს, შერჩეული წამყვანი და სხვა მსახიობები კი თავდაპირველად მაგიდის ირგვლივ იკრიბებიან სცენარის გასავლელად. ეს ეტაპი, როგორც ჩანს, კელსის ერთულა...

"სცენარისტების ოთახში ყოფნა სახალისოა, რადგან სულ ახალ-ახალ იდეებს გაწვდიან", — იხსენებს სპორტსმენი ერთ-ერთ პოდკასტერთან ინტერვიუში, — "თუმცა, იმ ტიპისთვის, რომელმაც ასე კარგადაც არ იცის კითხვა, მაგიდასთან სცენარის წაკითხვა საკმაოდ უსიამოვნო სიტუაციაა. იმის ნაცვლად რომ ტექსტი გამეთამაშებინა, უბრალოდ, ვცდილობდი, კითხვისას არაფერი შემშლოდა. მთლიანად კონცენტრირებული ვიყავი და საკუთარ თავს ვეუბნებოდი, ეს წინადადება არ გამოტოვო-მეთქი".

თუმცა, მაგიდიდან ადგომის შემდეგ, კელსის თქმით, ყველაფერი გამარტივდა. ამერიკის ეროვნული საფეხბურთო ლიგის ჩემპიონი ამბობს, რომ "კომედიას და ცანცარს" ადვილად გაუშინაურდა.

ალბათ გადაჭარბებული არ იქნება, თუ ვიტყვით, რომ ტრევის კელსის საყოველთაო პოპულარობა საფეხბურთო კარიერაზე მეტად ტეილორ სვიფტთან ურთიერთობამ მოუტანა. ეგ კი არა, ამერიკის საფეხბურთო ლიგის შარშანდელ ფინალზე, "სუპერ-ბოულზე", მაყურებლების 20 პროცენტი კელსის გუნდს სვიფტის გამო უჭერდა მხარს.

კელსი კი სპორტული კარიერიდან ნელ-ნელა ჰოლივუდისკენაც ინაცვლებს. ფეხბურთელი, რომელიც სერიალ Grotesquerie-ში თამაშობს, სულ მალე ნეტფლიქსის სპორტულ კომედიაში, Happy Gilmore-ის გაგრძელებაში, გამოჩნდება ადამ სენდლერთან ერთად.