"16:00 საათზე, თბილისის დროით, წესით უნდა ჩაგვერთოს გიორგი გახარია, ვინაიდან ასეთი იყო მისი მრავალდღიანი ვედრება," — ამის შესახებ ოცნების საგამოძიებო კომისიის თავმჯდომარემ თეა წულუკიანმა თქვა და აღნიშნა, რომ გიორგი გახარიას "მართლაც აქვს განზრახული რომ ჩაერთოს და შემდეგ ეთერი გათიშოს"

წულუკიანი ყოფილ პრემიერს ემუქრება და ამბობს, რომ ნებისმიერი ქმედება გიორგი გახარიას მხრიდან, რომელიც გულისხმობს სხდომის ჩაშლას, ჩაითვლება სისხლის სამართლის კოდექსის ის 349-ე მუხლის დარღვევად, რაც კომისიის მოთხოვნის შეუსრულებლობას გულისხმობს.

"16:00 საათზე, თბილისის დროით, წესით უნდა ჩაგვერთოს გიორგი გახარია, ვინაიდან ასეთი იყო მისი მრავალდღიანი ვედრება და ჩვენ ეს დავაკმაყოფილეთ, როგორც გახსოვთ, თუმცა ბატონმა გახარიამ თავისი პარტიის Facebook გვერდზე გამოაქვეყნა "ქარდი" და თქვა, გამორთვებს არ ვართო. ჩვენ ძალიან გაგვიჭირდა იმ გადაწყვეტილების მიღება, რომ მისი ჩართვის შესახებ თხოვნა დაგვეკმაყოფილებინა და მე პირადად არ მინდა ზედმეტად ეჭვიანი ვიყო, მაგრამ ვფიქრობ, რომ მას მართლაც აქვს განზრახული რომ ჩაერთოს და შემდეგ ეთერი გათიშოს, ამიტომ მე მინდა მას მკაცრად მივმართო და გავაფრთხილო (განსაკუთრებით მის გარემოცვას და ამფსონებს), რომ ჩვენ გვაქვს თმენის ვალდებულება, მაგრამ ამ თმენის ვალდებულებას აქვს თავისი ლიმიტი და ნებისმიერი ქმედება მისი მხრიდან, რომელიც იგულისხმებს სხდომის ჩაშლას ამა თუ იმ ფორმით, პირდაპირ ჩაითვლება ჩვენი მხრიდან სისხლის სამართლის კოდექსის 349-ე მუხლის დარღვევად და გადაიგზავნება იქ, სადაც საჭიროა. შემდეგ კომპეტენტური პირები მისცემენ კვალიფიკაციას და შეაფასებენ. ამიტომ, იმედი მაქვს 16:00 საათზე ჩანიშნული სხდომა ჩაივლის მშვიდობიანად"

ცნობისთვის, გიორგი გახარიას ე.წ. ჩორჩანას ეპიზოდთან დაკავშირებით განმეორებით გამოსაკითხად 23 ივნისს დაიბარეს, მაგრამ უცხოეთში ვიზიტის გამო გახარიამ კომისიას ონლაინ -ჩართვა შესთავაზა, რაზეც წულუკიანის კომისიამ მაშინ უარი უთხრა.

გახარია საქართველოსთვის: გიორგი გახარიამ გამოთქვა მზაობა, საგამოძიებო კომისიის სხდომაში მონაწილეობა მიიღოს დისტანციურად

შეგახსენებთ, მიმდინარე წლის 14 ივნისს ცნობილი გახდა, რომ პროკურატურამ დაიწყო გამოძიება "2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ შინაგან საქმეთა ყოფილი მინისტრის, გიორგი გახარიას მიერ განხორციელებული ქმედებას ეხება".

უწყების ინფორმაციით, გამოძიება სისხლის სამართლის კოდექსით, "საბოტაჟის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე" მიმდინარეობს.

ასევე იხილეთ:

• წულუკიანის კომისია გიორგი გახარიას დასთანხმდა, რომ 2 ივლისს დაგეგმილ სხდომას დისტანციურად ჩაერთოს
• გიორგი გახარია წულუკიანის კომისიაზე მეორედ დაიბარეს
• გახარია საქართველოსთვის: გახარიას ხელმძღვანელობით ჩორჩანაში საგუშაგოს ჩადგმის შედეგად არ დაგვიკარგავს არც ერთი გოჯი მიწა
• მაია ცქიტიშვილის თქმით, მას ჰქონდა ინფორმაცია ჩორჩანას საგუშაგოსა და იქ გზის გაყვანის საჭიროებაზე
• ირაკლი კობახიძე: ჩორჩანაში რაც მოხდა, ეს იყო იმის მინი მოდელი, რაც მოხდა 2008 წელს, როდესაც სააკაშვილის რეჟიმმა დაიწყო ომი
• რუსები ახდენენ ზეწოლას, იმიტომ რომ დღემდე სამხრეთ ოსეთისთვის ჩორჩანას საგუშაგო ძალიან დიდი პრობლემაა — ირაკლი შაიშმელაშვილი ჩორჩანაში საგუშაგოზე