პარლამენტში, სადაც უზენაესი სასამართლოს მოსამართლეობის კანდიდატ თამარ ალანიასთან გასაუბრება მიმდინარეობს, ოკუპაციაზე პოზიციის დაფიქსირებასა და ეთიკის ნორმებზე იკამათეს.

"ცხადია, ეს თქვა კანონმა", — ასე უპასუხა კანდიდატმა კითხვას, არის თუ არა რუსეთი ოკუპანტი. ევროპული საქართველოს დეპუტატმა, გიგა ბოკერიამ ალანიას ჰკითხა, რა შუაში იყო კანონი და შეეძლო თუ არა ეთქვა, რომ რუსეთი ოკუპანტია. ამ დროს საუბარში კომიტეტის თავმჯდომარე ანრი ოხანაშვილი ჩაერთო და განაცხადა, რომ დეპუტატებმა უნდა გაითვალისწინონ, რომ მოქმედ მოსამართლეს ესაუბრებიან.

ბოკერიამ აღნიშნა, რომ მანამდე ალანიამ ღიად დააფიქსირა პოზიცია სხვა სახის დანაშაულებებზე. კერძოდ, თქვა, რომ სერიული მკვლელობა და ბავშვთა პორნოგრაფია მძიმე დანაშაულია, თუმცა თავი აარიდა ოკუპაციაზე საუბარს.

"ზედმეტი ემოციის გამოხატვა ასეთ საკითხებთან მიმართებაში არ არის საჭირო", — განაცხადა პასუხად ალანიამ. ბოკერიას დამაზუსტებელ კითხვაზე, არის თუ არა ზედმეტი ემოცია ოკუპაციის გაპროტესტება, ალანია პასუხობს: "დიახ, არ არის საჭირო. იმაზე აქცენტების გაკეთება..."

დღეს, 23 სექტემბერს პარლამენტში უზენაესი სასამართლოს მოსამართლეობის კანდიდატების მოსმენა დაიწყო. პარლამენტში შექმნილია სამუშაო ჯგუფი, რომლის ფარგლებში გაიმართება შეხვედრა თითოეულ კანდიდატთან. ამ ეტაპზე მოსამართლეებს იურიდიულ საკითხთა კომიტეტის სხდომაზე უსმენენ.

20-კაციანი სია იუსტიციის უმაღლესმა საბჭომ 4 სექტემბერს დაამტკიცა. სიაში აღმოჩნდა ის ხუთი "სადავო" მოსამართლე, რომელიც პარლამენტში დეკემბერში წარდგენილ 10-კაციან სიაში იყო, მათ შორის, გიორგი მიქაუტაძე, ნინო ქადაგიძე, პაატა სილაგაძე, მერაბ გაბინაშვილი, თამარ ალანია. წინა სია მმართველ პარტიაში განხეთქილების, არასამთავრობოებში კი პროტესტის მიზეზი გახდა.

შერჩეული 20 მოსამართლიდან, უმრავლესობას მრავალწლიანი სამოსამართლეო გამოცდილება აქვს, ორი პროკურორია, ერთი კი იუსტიციის უმაღლესი საბჭოს დამოუკიდებელი ინსპექტორი.