Amnesty International საქართველოში პოლიციის მხრიდან ძალადობის ჩამდენი პირების პასუხისგებაში მიცემის გლობალურ კამპანიას იწყებს და მოუწოდებს საქართველოს ხელისუფლებას, უზრუნველყოს, რომ მომიტინგეების წინააღმდეგ ძალადობაში პასუხისმგებელი პირები პასუხისგებაში მიეცნენ.

საერთაშორისო ორგანიზაციის განცხადებით, 2024 წლის ნოემბრიდან მოყოლებული, მთელი საქართველოს მასშტაბით მომიტინგეები გადაჭარბებული ძალის, თვითნებური დაკავების, წამებისა და სხვა არასათანადო მოპყრობის მსხვერპლნი გახდნენ რეპრესიული კანონებისა და ქვეყნის ევროკავშირში გაწევრიანების პროცესის შეჩერების წინააღმდეგ ძირითადად მშვიდობიან საპროტესტო აქციებში მონაწილეობის გამო.

Amnesty International აღნიშნავს, რომ დღემდე არცერთი პოლიციელი არ მიცემულა პასუხისგებაში.

"საქართველოს ხელისუფლებამ უნდა შეწყვიტოს მომიტინგეების დაშლის, ცემის, შევიწროებისა და სისხლის სამართლის შერჩევითი გამოყენების პრაქტიკა. საერთაშორისო მხარდაჭერა და ყურადღება კრიტიკულად მნიშვნელოვანია მშვიდობიანი პროტესტის უფლების დასაცავად და იმისთვის, რომ საქართველოს ხელისუფლებას ვაიძულოთ, პატივი სცეს ადამიანის უფლებების დაცვის ვალდებულებებს", — განაცხადა Amnesty International-ის აღმოსავლეთ ევროპისა და ცენტრალური აზიის დირექტორის მოადგილემ, დენის კრივოშეევმა.

ორგანიზაციის შეფასებით, საერთაშორისო მხარდაჭერა და ყურადღება კრიტიკულად მნიშვნელოვანია მშვიდობიანი პროტესტის უფლების დასაცავად და საქართველოს ხელისუფლებაზე ადამიანის უფლებათა ვალდებულებების შესრულებისკენ ზეწოლის მიზნით.

ცნობილია, რომ კამპანიის ფარგლებში Amnesty International განსაკუთრებით კონკრეტული მომიტინგეების საქმეებზე გაამახვილებს ყურადღებას, მათ შორის საბა სხვიტარიძისა და მზია ამაღლობელის, რომლებიც ორგანიზაციის შეფასებით, პროტესტის უფლების გამოყენების გამო წამებისა და არასათანადო მოპყრობის, უსამართლო მართლმსაჯულებისა და პატიმრობის მსხვერპლნი გახდნენ.

Amnesty International-მა მაისში გამოაქვეყნა კვლევა, რომელშიც დეტალურად იყო აღწერილი ქალი მომიტინგეების გენდერული ნიშნით შევიწროება და ძალადობა. ორგანიზაციამ ასევე გამოაქვეყნა ვიდეო, რომელშიც მონაწილეობს ქართველი მხატვარი და აქტივისტი ქრისტინა ბოტკოველი (ნენსი ვოლანდი), რომელიც პროტესტში მონაწილეობის შემდეგ დააკავეს, გაშიშვლებით გაჩხრიკეს, შეავიწროვეს და დაემუქრნენ. ის ერთ-ერთია იმ ქალებს შორის, რომლებიც პოლიციის მხრიდან ძალადობაზე საუბრობენ.

Amnesty International მოუწოდებს საქართველოს გენერალურ პროკურორს, უზრუნველყოს სწრაფი, დამოუკიდებელი და ეფექტური გამოძიება მომიტინგეებისა და სხვა პირების მიმართ წამებისა და სხვა არასათანადო მოპყრობის ყველა ბრალდებაზე. ორგანიზაცია უწყებას მოუწოდებს პასუხისგებაში მისცეს ყველა დამნაშავე, უზრუნველყოს სამართლიანობა და მსხვერპლთათვის ზიანის ანაზღაურება.

ასევე იხილეთ: