იუსტიციის უმაღლესმა საბჭომ პარლამენტისთვის წარსადგენი უზენაესის მოსამართლეობის კანდიდატთა სია დაამტკიცა. სიაში მოხვდნენ კანდიდატები, რომლებმაც საბჭოს წევრების ორ მესამედზე მეტი ხმა მიიღეს. სიაში არიან:

1. თამარ ალანია — 11 ხმა;
2. მერაბ გაბინაშვილი — 11 ხმა;
3. შოთა გეწაძე — 11 ხმა;
4. მირანდა ერემაძე — 10 ხმა;
5. მამუკა ვასაძე — 10 ხმა;
6. მაია ვაჩაძე — 11 ხმა;
7. თამარ ზამბახიძე — 11 ხმა;
8. შალვა თადუმაძე — 10 ხმა;
9. ზაზა თავაძე — 10 ხმა;
10. ვლადიმერ კაკაბაძე — 10 ხმა;
11. ლევან მიქაბერიძე — 10 ხმა;
12. გიორგი მიქაუტაძე — 11 ხმა;
13. პაატა სილაგაძე — 10 ხმა;
14. ნუგზარ სხირტლაძე — 11 ხმა;
15. ლალი ფაფიაშვილი — 11 ხმა;
16. ნინო ქადაგიძე — 11 ხმა;
17. ლაშა ქოჩიაშვილი — 10 ხმა;
18. ქეთევან ცინცაძე — 10 ხმა;
19. ალექსანდრე წულაძე — 10 ხმა;
20. გოჩა ჯეირანაშვილი — 10 ხმა.

ამ სიაშია 5 ის მოსამართლე, რომელიც პარლამენტში აქამდე წარდგენილ 10-კაციან სიაში იყო: გიორგი მიქაუტაძე; ნინო ქადაგიძე; პაატა სილაგაძე; მერაბ გაბინაშვილი; თამარ ალანია. წინა სია მმართველ პარტიაში განხეთქილების, არასამთავრობოებში კი პროტესტის მიზეზი გახდა.

სანამ საბჭო სიას დაამტკიცებდა, მანამდე მოსამართლეებს ქულები დაუწერეს, რომლებიც ასე გადანაწილდა:

1. მაია ვაჩაძე — 11 ქულა;
2. გიორგი მიქაუტაძე — 11 ქულა;
3. მერაბ გაბინაშვილი — 10 ქულა;
4. შოთა გეწაძე — 10 ქულა;
5. ნუგზარ სხირტლაძე — 10 ქულა;
6. თამარ ალანია — 9 ქულა;
7. თამარ ზამბახიძე — 9 ქულა;
8. შალვა თადუმაძე — 9 ქულა;
9. ქეთევან ცინცაძე — 9 ქულა;
10. მირანდა ერემაძე — 8 ქულა;
11. მამუკა ვასაძე — 8 ქულა;
12. ზაზა თავაძე — 8 ქულა;
13. ლალი ფაფიაშვილი — 8 ქულა;
14. ნინო ქადაგიძე — 8 ქულა;
15. გოჩა ჯეირანაშვილი — 8 ქულა;
16. ვლადიმერ კაკაბაძე — 7 ქულა;
17. ლევან მიქაბერიძე — 7 ქულა;
18. პაატა სილაგაძე — 7 ქულა;
19. ლაშა ქოჩიაშვილი — 7 ქულა;
20. ალექსანდრე წულაძე — 7 ქულა.

დიმიტრი გვრიტიშვილმა, რომელიც იუსტიციის უმაღლესი საბჭოს მდივნის ფუნქციას ითავსებდა, განაცხადა, რომ სიას პარლამენტს უახლოეს დღეებში გადაუგზავნიან. პარლამენტმა სია ჯერ კომიტეტებში, შემდეგ კი პლენარულ სხდომაზე უნდა განიხილოს და გადაწყვიტოს დაამტკიცებს თუ არა ამ მოსამართლეებს უვადოდ.

უზენაესის მოსამართლეთა კონკურსი

2018 წელს პარლამენტისთვის დასამტკიცებლად წარდგენილ სიაში მოსამართლეობის 10 კანდიდატი იყო, მათ შორის, საბჭოს მდივანი გიორგი მიქაუტაძე, თბილისის სააპელაციო სასამართლოს თავმჯდომარე მიხეილ ჩინჩალაძე, იუსტიციის საბჭოს მოსამართლე წევრი დიმიტრი გვრიტიშვილი და თბილისის სააპელაციო სასამართლოს უვადო მოსამართლე თამარ ალანია. ამჟამინდელ კონკურსში გვრიტიშვილი და ჩინჩალაძე მონაწილეობას აღარ იღებენ. გიორგი მიქაუტაძე კი საქალაქო სასამართლოში უვადოდ გაამწესეს.

2018 წლის დეკემბერში უზენაესის მოსამართლეობის კანდიდატების 10-კაციან სიას პოლიტიკური დაპირისპირება მოჰყვა როგორც საპარლამენტო უმრავლესობაში, ისე ოპოზიციასა და არასამთავრობო სექტორში. კრიტიკა ორ ძირითად საკითხს ეხებოდა:

• კრიტერიუმებისა და პროცედურების გარეშე შერჩეული 10 კანდიდატი;
• ე.წ. ჩინჩალაძე-მურუსიძის კლანის გაძლიერების საფრთხე.

უმრავლესობის დეპუტატებმა, მათ შორის ეკა ბესელიამ და გედევან ფოფხაძემ, პროტესტის ნიშნად ქართული ოცნებაც დატოვეს. ეკა ბესელია აცხადებდა, რომ 10-კაციანი სიის დამტკიცებას ქართული ოცნება და პარლამენტის თავმჯდომარე, ირაკლი კობახიძე ლობირებდა.

იუსტიციის საბჭომ სია პარლამენტიდან გამოითხოვა. ქართულმა ოცნებამ კი უზენაესის მოსამართლეთა შერჩევისა და წარდგენის პროცედურების კანონპროექტზე დაიწყო მუშაობა. კანონი პარლამენტმა პირველ მაისს დაამტკიცა. სწორედ, აღნიშნულ კრიტერიუმებისა და პროცედურების გათვალისწინებით უნდა შეარჩიოს იუსტიციის სამინისტრომ მოსამართლეობის კანდიდატები და შემდგომ, პარლამენტს წარუდგინოს.

ქართული ოცნების კანონპროექტს მხარი არ დაუჭირეს პარტიიდან წასულმა დეპუტატებმა და საპარლამენტო ოპოზიციამ. ისინი კანონპროექტის მესამე მოსმენიდან მეორე მოსმენაზე დაბრუნებას მოითხოვდნენ. მათი პოზიციით, ქართულმა ოცნებამ არ გაითვალისწინა ვენეციის კომისიისა და სხვა საერთაშორისო ორგანიზაციების რეკომენდაციები და ე.წ. კლანს საშუალება მისცა "უზენაეს სასამართლოშიც გაძლიერებულიყო".