პარტია გახარია საქართველოსთვის ლიდერი გიორგი გახარია პარტია საქართველოსთვის მიერ დაკავებული 12 მანდატის გაუქმებას საკუთარ სოციალურ ქსელში ეხმაურება. მისი თქმით, ეს ნაბიჯი პოლიტიკური დევნის ხელის შეწყობაა და მსგავსი ქმედებები "კრემლის სახელმძღვანელოში" აქამდეც უნახავს.

"დღეს ქართული ოცნება, ერთპარტიული რეჟიმის მსგავსად მოქმედმა მმართველმა ძალამ, ერთხმად მისცა ხმა პარტია საქართველოსთვის მიერ დაკავებული 12 მანდატის გაუქმებას.

პოლიტიკური ბოიკოტი არის კონსტიტუციური უფლება — უფლება, რომელიც პასუხისმგებლობით გამოვიყენეთ 2024 წლის გაყალბებული არჩევნების შემდეგ. ჩვენ უარი ვთქვით ტყვედ აყვანილ პარლამენტში შესვლაზე, თუმცა ხალხის მანდატები არ დაგვითმია.

ჩვენთვის მანდატების წართმევა პროცედურასთან არაფერ კავშირშია — ეს იყო გზა პოლიტიკური დევნისთვის ხელის შეწყობისა, იმუნიტეტის მოხსნისთვის შეთითხნილი ბრალდებების წარდგენამდე და პოლიტიკური საფრთხის განეიტრალების მცდელობა ადგილობრივი თვითმმართველობის არჩევნებამდე.

ეს უკვე ნანახი გვაქვს — კრემლის სახელმძღვანელოდან ამოგლეჯილი გვერდია: მოუხსენი იმუნიტეტი, შეთხზე ბრალდებები და მოიშორე პოლიტიკური ალტერნატივა," — დაწერა გახარიამ.

ცნობისთვის, პარტია გახარია საქართველოსთვის დეპუტატებს, სხდომების არასაპატიო მიზეზით გაცდენის გამო, პარლამენტის წევრის უფლებამოსილება შეუწყდათ.

დეპუტატობის მანდატი მოეხსნა 12 დეპუტატს — გიორგი გახარიას, თეონა აქუბარდიას, ანა ბუჩუკურს, ლევან გოგიჩაიშვილს, ზაზა თავაძეს, ბექა ლილუაშვილს, ნათია მეზვრიშვილს, ბერდია სიჭინავას, კახა ქემოკლიძეს, როინ ქოჩორაშვილს, დიმიტრი ცქიტიშვილს და ზვიად ძიძიგურს.

"გახარია საქართველოსთვის" 12 დეპუტატს პარლამენტის წევრის უფლებამოსილება შეუწყდათ