"საერთაშორისო გამჭვირვალობა-საქართველომ" (TI) ანტიკორუფციულ ბიუროს ოფიციალური წერილი გაუგზავნა, რომელშიც აღნიშნულია, რომ ორგანიზაცია მისი დაცვის ქვეშ მყოფი ადამიანების პერსონალური მონაცემების გადაცემას არ აპირებს. ამის შესახებ "საერთაშორისო გამჭვირვალობა-საქართველო" განცხადებას სოციალურ ქსელში აქვეყნებს.

"დღეს ოფიციალური წერილი გავუგზავნეთ ანტიკორუფციულ ბიუროს, რომელმაც კლანური სასამართლოს გავლით, "საერთაშორისო გამჭვირვალობა-საქართველოსგან" მოითხოვა ჩვენი დაცვის ქვეშ მყოფი ადამიანების პერსონალური მონაცემები და ასევე, ინფორმაცია ჩვენი საქმიანობის შესახებ.

რაც შეეხება ბენეფიციარებს, აქ ჩვენი პოზიცია მტკიცე და უღალატოა — ჩვენ იმ ადამიანების პირად ინფორმაციას ბოლომდე დავიცავთ და არავის გადავცემთ, ვისაც წლების განმავლობაში ვეხმარებოდით და გვენდობოდნენ.

შესაბამისად, ჩვენ არ გავცემთ ინფორმაციას ორგანიზაციის დაცვის ქვეშ მყოფთა შესახებ, რომელთა შორისაც არიან სახელმწიფოსგან დაჩაგრული ადამიანები: წამების და სხვა არასათანადო მოპყრობის მსხვერპლნი, საჯარო სამსახურებიდან უკანონოდ დათხოვნილები, მიწის მესაკუთრეები, რომლებსაც სახელმწიფომ უკანონოდ ჩამოართვა ნაკვეთები, სხვა დაზარალებული ადამიანები და მამხილებლები, რომლებიც თანამდებობის პირებს კორუფციაში ამხელენ," — წერია "საერთაშორისო გამჭვირვალობა-საქართველოს" მიერ გამოქვეყნებულ განცხადებაში.

განცხადებაში ასევე ვკითხულობთ, რომ ორგანიზაციამ ანტიკორუფციულ ბიუროს ოფიციალურად გაუგზავნა მათ ვებგვერდზე ნავიგაციის ინსტრუქცია, სადაც ბიურო შეძლებს ნახოს ინფორმაცია ორგანიზაციის საქმიანობისა და დაფინანსების შესახებ.

"ბიუროს ოფიციალურად გავუგზავნეთ ჩვენს ოფიციალურ ვებგვერდზე ნავიგაციის ინსტრუქცია, სადაც ყველასთვის ხელმისაწვდომია საქმიანობის, დაფინანსების, პროექტებისა და გუნდის შესახებ ინფორმაცია; ასევე, ინფორმაცია ჩვენი სოციალური ქსელების შესახებ.

რაც მთავარია, ჩვენი საქმიანობის უკეთ გაცნობის მიზნით, ბიუროს გავუგზავნეთ ჩვენი კორუფციული გამოძიებების ვრცელი სია, სადაც 49 ყოფილი ან მოქმედი ჩინოვნიკის მონაწილეობით 65 საეჭვო შემთხვევაა თავმოყრილი, რომლებიც წლების განმავლობაში მდიდრდებოდნენ ჩვენი მოქალაქეების გაღარიბების ხარჯზე.

ჩვენ, როგორც ანტიკორუფციული ორგანიზაცია, ანტიკორუფციული ბიუროსგან მისი პირდაპირი მოვალეობის შესრულებას და ქვეყანაში სავარაუდო კორუფციულ შემთხვევებზე რეაგირებას მოველით.

წერილი იხილეთ აქ," — წერია განცხადებაში.

"საერთაშორისო გამჭვირვალობა-საქართველო" სოციალურ ქსელში მეორე განცხადებასაც ავრცელებს, სადაც აღნიშნავს, რომ ოცნების ანტიკორუფციულ ბიუროს ორგანიზაციის მიერ გამოძიებული კორუფციის ვრცელი სიაც გაუგზავნეს.

"ვიყენებთ შესაძლებლობას და ივანიშვილს-კუპრაშვილის ანტიკორუფციული ბიუროს, ოფიციალურ წერილთან ერთად, ვუგზავნით "საერთაშორისო გამჭვირვალობა — საქართველოს" კორუფციული გამოძიებების ვრცელ სიას, სადაც ასახულია, რომ ჩინოვნიკები წლების განმავლობაში მდიდრდებოდნენ ჩვენი მოქალაქეების გაღარიბების ხარჯზე.

ამ სიაში 65 შემთხვევაა თავმოყრილი, სადაც 49 ყოფილი ან მოქმედი ჩინოვნიკი ფიგურირებს
ჩვენ, როგორც ანტიკორუფციული ორგანიზაცია, ანტიკორუფციული ბიუროსგან მისი პირდაპირი მოვალეობის შესრულებას და ჩვენ მიერ გამოვლენილ კორუფციულ შემთხვევებზე რეაგირებას მოველით.

სია იხილეთ ვრცლად აქ
წერილი იხილეთ აქ," — წერია განცხადებაში.