2 ივლისს, ოცნების პარლამენტის დროებით საგამოძიებო კომისიაზე ონლაინ-დაკითხვაზე მყოფმა ყოფილმა შს მინისტრმა, გიორგი გახარიამ ჩორჩანას ეპიზოდზე საუბრისასა განაცხადა, რომ კონფლიქტის ესკალაციის რისკები სუს-ს უნდა გაეთვალა და კომისიამ ეს კითხვები ვახტანგ გომელაურს უნდა დაუსვას.

გახარიამ ისიც თქვა, რომ ვახტანგ გომელაური "გააგდეს" და ხვალ შეიძლება დასაჭერი გაუხდეთ“.

"მე წინაზე გთხოვეთ, ვახოს თავი დაანებეთ, თავის გაჭირვება ეყოფა-თქო, მაგრამ არ დაანებეთ თავი. ის კაცი ისე გააგდეთ, ხვალ დასაჭერი არ გაგიხდეთ", — განაცხადა გახარიამ.

ოცნების პარლამენტის დროებითი საგამოძიებო კომისიის თავმჯდომარემ, გირაო გახარიას ჰკითხა გათვალა თუ არა რისკები, როცა ჩორჩანაში საგუშაგოს ხსნიდა.

"რა რისკებზე იფიქრეთ და რა მოლოდინი გქონდათ, რუსეთის საპასუხო რეაქცია რა იქნებოდა იმ "კეთილშობილურ" ნაბიჯზე, რომ წაღვლელებს, ჩორჩანელებს და ყველას ამოუშანთეთ ფეხი იმ ქართული ტერიტორიიდან, სადაც ისინი შედიოდნენ? თქვენ თვლით, რომ ეს კარგი ნაბიჯი იყო, მაგრამ დავანებოთ ამას თავი, "კეთილშობილურ" ნაბიჯს რომ დგამდით, გათვალეთ თუ არა რუსების რეაქცია და რა გათვალეთ?" — ჰკითხა წულუკიანმა გახარიას.

გახარიამ უპასუხა, რომ საგუშაგოს გახსნით კონფლიქტის ესკალაცია არ მოხდებოდა.

"ზუსტად ისე გავთვალეთ, როგორც მოხდა — ის, რომ კონფლიქტის ესკალაცია არ მოხდებოდა და არც მოხდა.

რა გინდათ, რომ ომის რისკი... აგერ ვახო გომელაური იყო და ინტერვიუ მისცა, ეგ რისკი გავთვალეთო და 10%-იო...", — უპასუხა გახარიამ წულუკიანს.

"დაანებეთ ამ ვახო გომელაურის კომპლექსში ცხოვრებას თავი", — მიმართა წულუკიანმა.

"თვითონ არ დამანება და ახლა მოითმინოს. ამიტომ, ეგ კითხვა დაუსვით სუს-ს, რომელსაც ეგ რისკები უნდა გაეთვალა", — უთხრა გახარიამ კომისიის წევრებს.

"სუს-ს, რომელსაც არაფერი არ შეატყობინეთ", — მიმართა წულუკიანმა.

"ყველაფერი იცოდა სუს-მა, სუს-ი გაურბის თავის პასუხისმგებლობას იმიტომ, რომ თუ ის, რასაც სუს-ი ამბობს, ეს იყო სიმართლე და ისინი მართლა ასე ფიქრობდნენ, მაშინ არანაირი ახსნა არ აქვს, უშიშროებაზე პასუხისმგებელი უწყება ერთ კვირაში რომ ადამიანს, რომელსაც ასეთ რისკებში შეჰყავდა ქვეყანა, პრემიერად ნიშნავენ და ხმას არ იღებს, ეს არის ქვეყნის ღალატი და თუ "დიფ სტეიტმა" დაურეკა და დაუჯერეს ამას, ეს კიდევ ორმაგი ღალატია, ამიტომ გაითვალისწინეთ ეს, მანდ გასასვლელი არ გაქვთ თქვენ იმიტომ, რომ იტყუებით, ყველა ნაბიჯზე იტყუებით", — განაცხადა გახარია კომისიის სხდომაზე (კომენტარებს IPN ავრცელებს)

ცნობისთვის, გიორგი გახარიას ე.წ. ჩორჩანას ეპიზოდთან დაკავშირებით განმეორებით გამოსაკითხად 23 ივნისს დაიბარეს. უცხოეთში ვიზიტის გამო გახარიამ კომისიას ჩართვა ონლაინ-ფორმატში შესთავაზა, რაზეც წულუკიანის კომისიამ უარი უთხრა და სხდომაზე განმეორებით 2 ივლისს დაიბარეს, შემდეგ კი მის ონლაინ-რეჟიმში ჩართვასაც დასთანხმდნენ. პირველად გიორგი გახარია წულუკიანის კომისიაზე 14 აპრილს წარსდგა. მაშინ სხვა საკითხებთან ერთად ჩორჩანას ეპიზოდზეც მოუწია გახარიას პასუხების გაცემა.

რატომ მივიდა გახარია საგამოძიებო კომისიაზე, ვინ გასცა 20 ივნისს რეზინის ტყვიების გამოყენების ნებართვა? — მთავარი 6-საათიანი სხდომიდან

შეგახსენებთ, მიმდინარე წლის 14 ივნისს ცნობილი გახდა, რომ პროკურატურამ დაიწყო გამოძიება "2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ შინაგან საქმეთა ყოფილი მინისტრის, გიორგი გახარიას მიერ განხორციელებული ქმედებას ეხება".

უწყების ინფორმაციით, გამოძიება სისხლის სამართლის კოდექსით, "საბოტაჟის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე" მიმდინარეობს.

მეტი ჩორჩანას საგუშაგოს შესახებ: