ამერიკის შეერთებული შტატების სენატში რესპუბლიკელებმა მცირე უპირატესობით დაამტკიცეს დონალდ ტრამპის მასშტაბური საგადასახადო და საბიუჯეტო კანონი — ე.წ "დიდი, მშვენიერი კანონი".

კანონპროექტს გადამწყვეტი ხმა ვიცეპრეზიდენტმა ჯეი დი ვენსმა მისცა მას შემდეგ, რაც სენატში კენჭისყრა 50-50-ის წინააღმდეგ დასრულდა. ამის შესახებ ინფორმაციას BBC ავრცელებს.

კანონი მუდმივ ძალაში დატოვებს ტრამპის ადმინისტრაციის მიერ მიღებულ დროებით საგადასახადო შეღავათებს და შემოსავლის ნაკლებობის ანაზღაურებას სამედიცინო დახმარებისა და სურსათის სუბსიდირების პროგრამების მსგავსი სოციალური ხარჯების შემცირებით გეგმავს.

დებატებზე დემოკრატებმა კანონის შეფერხება კანონპროექტის სრული ტექსტის ხმამაღლა წაკითხვითა და ე.წ. vote-a-rama პროცესით სცადეს. ამავე დროს, წარმომადგენელთა პალატაში მყოფი კონსერვატორები მოითხოვენ პასუხებს კითხვაზე, თუ რამდენად შეამცირებს კანონპროექტი ბიუჯეტის დეფიციტს, რადგან მათი გათვლებით სენატის ვერსია ყოველწლიურად დეფიციტს $650 მილიარდით გაზრდის.

მილიარდერი ილონ მასკი, რომელიც ტრამპს 2024 წლის საარჩევნო კამპანიაში უჭერდა მხარს და ბიუჯეტის შემცირების მხარდამჭერი იყო, ახლა კანონპროექტს აქტიურად ეწინააღმდეგება. მან უკვე განაცხადა, რომ თუ ეს კანონი მიიღება, შესაძლოა ახალი პოლიტიკური პარტიის შექმნაც განიხილოს და საპრეზიდენტო არცევნებში დემოკრატი კანდიდატი დააფინანსოს.

მისი თქმით, "კონგრესის ყველა წევრს, ვინც ხარჯების შემცირებას უჭერდა მხარს და ახლა ქვეყნის ყველაზე მასშტაბური დეფიციტის მომტან კანონს აძლევს ხმას, უნდა შერცხვეს". მასკი ასევე უკმაყოფილოა განახლებადი ენერგიისა და ელექტრომობილების სუბსიდიების შემცირებით, რაც ტესლას ინტერესებს აზიანებს.