უზენაესი სასამართლოს მოსამართლეობის კანდიდატი თამარ ალანია აცხადებს, რომ არ იცის რა არის არაფორმალური მმართველობა. ასე უპასუხა მან ნაციონალური მოძრაობის დეპუტატის, რომან გოცირიძის კითხვას.

გოცირიძემ კანდიდატს განუმარტა, რომ გულისხმობდა ხელისუფლების შტოებს შორის ბალანსის არარსებობას და სახელმწიფოს არაკონსტიტუციური მეთოდებით მართვას.

"ეს არ მესმის. ერთპიროვნულზე ვიფიქრე, მაგრამ ერთპიროვნული თქვენთვის არ იყო მისაღები პასუხი და არაფორმალური არ მესმის რას ნიშნავს", — განაცხადა ალანიამ.

გოცირიძემ აღნიშნა, რომ ტერმინი "არაფორმალური მმართველობა" კანდიდატს შეიძლება არ ესმოდეს, რადგან ჟარგონია, ამიტომ იკითხა ახსენდება თუ არა არაკონსტიტუციური მმართველობის მაგალითები:

"წარმოიდგინეთ ვირტუალური სახელმწიფო, სადაც არის ადამიანი, რომელსაც აქვს ბევრი ფული და არ აქვს არანაირი თანამდებობა... თავისი ბიზნესი აქვს და ამ ბიზნესიდან მოჰყავს ფიგურები და მას ნიშნავს მინისტრად, მოსამართლედ. შეუძლია საკუთარი დაცვის წარმოამდგენელი დანიშნოს შს მინისტრად, პირადი ექიმი ჯანდაცვის მინისტრად... მას შეიძლება ჰყავდეს პერსონალური ბანკირი, რომელიც დანიშნა პრემიერ-მინისტრად... თქვენ როგორ ფიქრობთ, რა ტიპის მმართველობაა ეს?"

ალანიამ თქვა, რომ თეორიულად ეს არც ერთი ტიპის მმართველობა არ არის და მისთვის ეს უცნობია.

"მმართველობა გულისხმობს სახელმწიფო ხელისუფლებაში რაღაცა პოზიციის ქონას. შესაბამისად, თუ ასეთი პოზიცია არ გააჩნია ადამიანს რა მმართველობაზე შეგვიძლია საუბარი" — განაცხადა ალანიამ.

არაფორმალურ მმართველად საქართველოში ქართული ოცნების თავმჯდომარეს ბიძინა ივანიშვილს მოიხსენიებენ. მას შემდეგ, რაც ივანიშვილმა პრემიერის თანამდებობა დატოვა ოპოზიცია და სამოქალაქო საზოგადოება აცხადებდა, რომ ის მმართავდა ხელისუფლების სხვადასხვა შტოებს და მთავრობა გადაწყვეტილებებს მასთან შეთანხმებით იღებდა.

დღეს, 23 სექტემბერს პარლამენტში უზენაესი სასამართლოს მოსამართლეობის კანდიდატების მოსმენა დაიწყო. პარლამენტში შექმნილია სამუშაო ჯგუფი, რომლის ფარგლებში გაიმართება შეხვედრა თითოეულ კანდიდატთან. ამ ეტაპზე მოსამართლეებს იურიდიულ საკითხთა კომიტეტის სხდომაზე უსმენენ.

20-კაციანი სია იუსტიციის უმაღლესმა საბჭომ 4 სექტემბერს დაამტკიცა. სიაში აღმოჩნდა ის ხუთი "სადავო" მოსამართლე, რომელიც პარლამენტში დეკემბერში წარდგენილ 10-კაციან სიაში იყო, მათ შორის, გიორგი მიქაუტაძე, ნინო ქადაგიძე, პაატა სილაგაძე, მერაბ გაბინაშვილი, თამარ ალანია. წინა სია მმართველ პარტიაში განხეთქილების, არასამთავრობოებში კი პროტესტის მიზეზი გახდა.

ამავე თემაზე: