თუ ეიფელის კოშკი ზაფხულშიც ნანახი გაქვს და ზამთარშიც, შეიძლება შენც ამ ორ სეზონზე კოშკის სიმაღლეში არსებული განსხვავება. მართალია, ეს ცვლილება შეუიარაღებელი თვალით ძნელად შესამჩნევია, მაგრამ მეცნიერებისთვის კარგად ცნობილი ფაქტია, რომ ზაფხულში ეიფელის კოშკი საშუალოდ 10–15 სანტიმეტრით იზრდება.

ერთ-ერთი ყველაზე ცნობილი არქიტექტურული კონსტრუქცია, რომელიც მყარად და უძრავად გვეჩვენება, სინამდვილეში ცოცხალი სხეულივით რეაგირებს სეზონურ ტემპერატურულ ცვლილებაზე.

ფენომენს, რომელიც ამ ცვლილებას იწვევს, თერმული გაფართოება ჰქვია. როცა მეტალი — განსაკუთრებით რკინა, რომელიც ეიფელის კოშკის ძირითადი მასალაა — ცხელ ტემპერატურაზე ხურდება, მასში არსებული ატომები უფრო ინტენსიურად მოძრაობენ და მეტ სივრცეს იკავებენ. ამის შედეგად, კონსტრუქცია ოდნავ "იბერება" — ეიფელის შემთხვევაში, ეს ზრდა სიმაღლეში შეინიშნება. ზამთარში კი, როცა ტემპერატურა იკლებს, ატომები ისევ კომპაქტურად ეწყობიან და კოშკი სიმაღლეში "კლებულობს".

ფოტო: Hristo Rusev / Getty Images

საინტერესოა ისიც, რომ კონსტრუქციას მხოლოდ სიმაღლე არ ეცვლება — მზის პირდაპირი სხივების ზემოქმედებით, კოშკის გარკვეული ნაწილები არათანაბრად ცხელდება, რაც მცირე, მაგრამ ტექნიკურად გათვლილი ვიბრაციებისა და გადახრების მიზეზი ხდება. თუმცა არქიტექტორ გუსტავ ეიფელის გუნდმა თავიდანვე გაითვალისწინა ეს პროცესები და კოშკის სტრუქტურა ისე დაგეგმა, რომ თერმულმა ცვლილებებმა მას არანაირი ზიანი არ მიაყენოს.

ოფიციალური ინფორმაცია ამ თემაზე მითითებულია ეიფელის კოშკის ოფიციალურ ვებგვერდზეც, ხოლო ისეთი სანდო წყაროები, როგორებიცაა BBC და Science Focus, ადასტურებენ, რომ ზაფხულის თვეებში ეიფელის კოშკის სიმაღლე საშუალოდ 10–15 სმ-ით იზრდება, რაც რკინის მასალისთვის საკმაოდ ბუნებრივი და უსაფრთხო პროცესია.

ამ ფენომენს მეცნიერები ათწლეულებია იკვლევენ და ის კიდევ ერთხელ გვახსენებს, რომ სტაბილურად მონუმენტური ობიექტებიც კი შეიძლება ბუნების კანონებს დაემორჩილონ.