"ოცნების" პარლამენტმა დაჩქარებული წესით მიიღო კანონი, რომლითაც მარიხუანას და კანაფის შეძენასა და შენახვაზე კანონი მკაცრდება.

მცენარე კანაფის 10-დან 155 გრამამდე, ნედლი მარიხუანას 10-დან 140 გრამამდე, გამომშრალი მარიხუანას 5-დან 70 გრამამდე შეძენა და შენახვა 6 წლამდე ვადით თავისუფლების აღკვეთას გამოიწვევს.

10 გრამამდე კანაფის, 10 გრამამდე ნედლი მარიხუანასა და 5 გრამამდე გამომშრალი მარიხუანას შეძენა, შენახვა, გადაზიდვა და გადაგზავნა პირველ შემთხვევაზე ადმინისტრაციულ პასუხისმგებლობას გამოიწვევს, ხოლო გამეორების შემთხვევაში კი სასჯელის სახედ ჯარიმა, ან საზოგადოებისთვის სასარგებლო შრომა, ან 1 წლამდე ვადით თავისუფლების აღკვეთა განისაზღვრება.

რაც შეეხება კანაფის მოყვანასა და კულტივაციას, 155 გრამამდე მცენარე კანაფის მოყვანისთვის განისაზღვრება 6 წლამდე თავისუფლების აღკვეთა, ან საზოგადოებისთვის სასარგებლო შრომა ან შინაპატიმრობა.

ჯარიმით ან საზოგადოებისთვის სასარგებლო შრომით ნარკოტიკული საშუალების შემცველი მცენარის უკანონო დათესვაც დაისჯება — 200-დან 400 საათამდე შრომით, შინაპატიმრობის ვადით 6 თვიდან 2 წლამდე, თავისუფლების აღკვეთით ვადით 2-დან 6 წლამდე.