განათლებისა და მეცნიერების მინისტრი ალექსანდრე ჯეჯელავა დღეს ზოგად განათლებაში განხორციელებულ და დაგეგმილ სიახლეებზე სასაუბროდ ჟურნალისტებს შეხვდა. მან განათლების სისტემაში დანერგილ სიახლეებსა და სამომავლო გეგმებზე ისაუბრა.

მინისტრის გაცხადებით, ერთ-ერთი ყველაზე მნიშვნელოვანი საკითხი განათლების სისტემაში ისაა, რომ წელს სკოლის ყველა სახელმძღვანელოს ექსპლუატაციის ვადა გასდის და დაახლოებით ორ კვირაში მათ ხელახლა დაწერაზე კონკურსი გამოცხადდება. წიგნების გრიფირება, მათი შეძენა და მომავალ წელს მოსწავლეებისთვის შინაარსობრივად და ფიზიკურად ახალი სახელმძღვანელოების გადაცემა, სახელმწიფოს დაახლოებით 17-18 მილიონი ლარი დაუჯდება.

გრიფირება ყოველ წელს გამოცხადდება, რაც შესაძლებელს გახდის წიგნებში სიახლეები ყოველწლიურად შევიდეს. მინისტრის განცხადებით, წინასწარ 10 წლის მარაგი წიგნების დაბეჭდვას და გამოცემასთან შედარებით, ეს 15-17 პროცენტით მეტი დაჯდება.

ალექსანდრე ჯეჯელავა ამბობს, რომ ბოლო 5 წლის განმავლობაში შობადობის ზრდამ სკოლებში ადგილების ნაკლებობაც გამოიწვია, ამას თან ერთვის ურბანიზაციის პროცესიც, მისი პირველკლასელების რიცხვი ყოველწლიურად იმატებს და ეს მეტად შესამჩნევი თბილისის სკოლებშია:

"გლდანის სკოლაში ბავშვის შესვლა ჰარვარდში მოხვედრაზე ძნელი გახდა. რეგიონებიდან ჩამოსულების რიცხვი განსაკუთრებით გარეუბნებში მატულობს: გლდანი, ვარკეთილი დიდი დიღომი, თუმცა მოსწავლეების რაოდენობა სხვა სკოლებშიც მატულობს"

მინისტრის გაცხადებით, ამ ეტაპზე აშენებულია 10 სკოლა, რეაბილიტაცია ჩაუტარდა დაახლოებით 100-ს და მიმდინარეობს 13-ის მშენებლობა.

შეხვედრაზე მან ასევე ისაუბრა სამომავლო გეგმებზე, რომლის მიხედვითაც, შესაძლოა, გამომცემლობებმა მოსწავლეებს წიგნების ელექტრონული ვერსიები შესთავაზონ, რაც შესაძლებელს გახდის მოსწავლემ წიგნებთან პარალელურ რეჟიმში შეძლოს მისი გამოყენება. თუმცა, რამდენი დაუჯდება მშობელს მისი შეძენა, ამ ეტაპზე ცნობილი არაა.

მინისტრმა ასევე წარადგინა რამდენიმე სიახლე:

• დაინერგა ელექტრონული ჟურნალების გამოყენება, რაც ჟურნალში ჩასწორების შესაძლებლობას აღმოფხვრის;
• შემუშავდა გეოგრაფიული საინფორმაციო სისტემა, რომლითაც შესაძლებელია გავიგოთ რომელ სკოლაში რამდენი ბავშვის სწავლობს და სხვა ინფორმაცია. მისი პრეზენტაცია დაახლოებით 2 თვეში გაიმართება;
• 456 სკოლაში იმუშავებს ექიმის ოთახი;
• 1 300 სპეციალური მასწავლებელი 5775 შშმ მოსწავლეს ასწავლის;
• ამ ეტაპზე 1 185 სკოლის 65 ათასი მოსწავლე სკოლის ტრანსპორტით სარგებლობს;

ტრანსპორტით მასწავლებლების მომსახურებას რაც შეეხება, მინისტრი აცხადებს, რომ ეს ჯერ-ჯერობით ვერ მოხერხდება, რადგან მოსწავლეებისთვის მომსახურება 17 მილიონი ლარი ჯდება, მასწავლებლების დამატების შემთხვევაში, კიდევ 8 მილიონის გამოყოფაა საჭირო, რისი შესაძლებლობაც ამ ეტაპზე არაა.

მისი გაცხადებით, იგეგმება ასევე სკოლებში თავისუფალი გაკვეთილების დანერგვაც, სადაც მოსწავლე ნებაყოფლობით შეძლებს დასწრებას, არ დაეწერება ნიშანი, არც აღრიცხვა მოხდება და მასწავლებელს სურვილის შემთხვევაში შეეძლება გაკვეთილი ჩაწეროს და საიტზე ატვირთოს, რისი ნახვის შესაძლებლობაც ახლადშექმნილ გეოგრაფიული საინფორმაციო სისტემის საშუალებით ყველას შეეძლება.