საქართველოს ახალგაზრდა იურისტთა ასოციაცია გუშინ, ამაღლების ქუჩაზე მომხდარ ინციდენტს ეხმაურება. საია-ს განცხადებით, პაატა სამარგულიანის მიმართ გამოყენებული ღონისძიება გამოხატვის თავისუფლებაში უკანონო და არათანაზომიერი ჩარევაა.

საქართველოს იურისტთა ასოციაციის შეფასებით, მოქალაქის დაკავება მხოლოდ კრიტიკული მოსაზრების გამო უკანონოა. ისინი აღნიშნავენ, რომ ევროპული კონვენცია და საქართველოს კონსტიტუცია იძლევა გამოხატვის თავისუფლების გარანტიას, ხოლო პოლიციის მიერ ძალის გამოყენება აღნიშნულ შემთხვევაში არაპროპორციული და გაუმართლებელი იყო.

"საქართველოს კონსტიტუციითა და ადამიანის უფლებათა ევროპული კონვენციითაა დაცული და გარანტირებულია პირის აზრისა და გამოხატვის თავისუფლება. მოქალაქეს უფლება აქვს გამოხატოს თავისი პოზიცია და გააკრიტიკოს სახელმწიფო უწყებების, მათ შორის, შინაგან საქმეთა სამინისტროს, წარმომადგენლების ქმედება. მოქალაქის მიერ წარმოთქმული ფრაზა ვერ ჩაითვლება პირის დაკავების საფუძვლად, მით უმეტეს, იმის გათვალისწინებით, რომ მოქალაქემ ეს თქვა სამართალდამცავების ქმედებების გაკრიტიკების კონტექსტში.

ევროპულ სასამართლოს, მათ შორის, საქართველოსთან მიმართებით მიღებულ გადაწყვეტილებაში აქვს განმარტებული, რომ თუ ადამიანის ქმედება (ამ შემთხვევაში, მისი გამოხატვა) არც ძალადობრივია, არც მიზნად ისახავს ძალადობას, არც აქვს რესურსი, გადაიზარდოს მოვლენათა ესკალაციაში, მის წინააღმდეგ დაკავების ინიციირება უკანონოა. ამასთან, ასევე, განმარტებული აქვს ევროპულ სასამართლოს, რომ დემოკრატიულ საზოგადოებაში მეტი ტოლერანტობა უნდა იქნეს გამოვლენილი იმ პირების მიმართ, რომლებიც გამოთქვამენ კრიტიკულ მოსაზრებებს, თუნდაც ეს მოსაზრებები, გამოხატული იყოს გაუმართავად ან ემოციური ფორმით.

გარდა იმისა, რომ მოქალაქის მიერ ზემოაღნიშნული ფრაზის გამო დაკავება გაუმართლებელია, გავრცელებული ვიდეო მასალის მიხედვით, არ იკვეთებოდა პოლიციელის მხრიდან ძალის გამოყენების აუცილებლობა. ეს ინციდენტი კიდევ ერთხელ ადასტურებს შინაგან საქმეთა სამინისტროს წარმომადგენელთა მხრიდან დაკავების, როგორც უკიდურესი ღონისძიების, თვითნებური გამოყენების პრაქტიკას".

შეგახსენებთ, რომ 2025 წლის 11 ივლისს გავრცელდა ვიდეო, სადაც გარკვევით ჩანს, რომ მოქალაქე გამოესარჩლა მოქალაქეს, რომელსაც პოლიციელი აკავებდა. პოლიციელის გაღიზიანება შემდეგმა ფრაზამ გამოიწვია: "მოვა დრო და დედას გიტირებენ". სამართალდამცავმა მოქალაქეს საყელოში მოქაჩა და ორ სხვა პოლიციელთან ერთად მის დაკავებას აპირებდა, რა დროსაც მოქალაქემ გონება დაკარგა.

პაატა სამარგულიანი აცხადებს, რომ მის წინააღმდეგაც საქმე აღიძრა და 12 ივლისს განყოფილებაშია დაბარებული.

ამავე თემაზე იხილეთ: