ოცნების პარლამენტის თავმჯდომარე, შალვა პაპუაშვილმა EU-ს საგარეო საქმეთა მინისტრების ერთობლივ განცხადებას გამოეხმაურა, სადაც ნათქვამია, რომ ისინი მზადყოფნას გამოხატავენ "გამოიყენონ მათ ხელთ არსებული მექანიზმები, თუკი საქართველოს ხელისუფლება გააგრძელებს ქვეყნის დემოკრატიისა და ადამიანის უფლებების პატივისცემის ძირის გამოთხრას".

მისი თქმით, მნიშვნელოვანია, რომ ევროკავშირი გამოფხიზლდეს და დაუბრუნდეს ევროპული ღირებულებების გზაზე.

"ის გზა, რომელზეც დღეს ბრიუსელის ბიუროკრატია დგას, არის გზა საბჭოთა კავშირისკენ. ამიტომ მნიშვნელოვანია, ევროკავშირმა საბჭოთა კავშირისკენ მიმავალი გზა შეაჩეროს და დაუბრუნდეს ძირეულ ღირებულებებს, როგორიცაა ადამიანის უფლებების პატივისცემა და კანონის უზენაესობა. ის ხალხი, ის სახელმწიფოები და ხელისუფლებები, რომლებიც ამბობენ, რომ პოლიციელზე წიხლით შედგომა, პოლიციელზე ქვისა და „მოლოტოვის კოქტეილის“ სროლა არის მშვიდობა, ეს ხალხი არ აცნობიერებს, რას ნიშნავს ადამიანის უფლებების პატივისცემა და სამართლის უზენაესობა. მთავარია, დასრულდეს ფარისევლობა და საბჭოთა კავშირის მიმავალი გზიდან მობრუნება", — განაცხადა შალვა პაპუაშვილმა

ამას გარდა, პაპუაშვილი ამბობს, რომ გამოკითხვები აჩვენებს, რომ "ნდობა ევროკავშირის მიმართ ეცემა იმიტომ, რომ ხედავენ, რომ ზემოდან დაგვყურებენ, როგორც მეორე ხარისხოვან ქვეყანას და ჩვენთან ყველაფერი უნდა იყოს შესაძლებელი, თუ ეს მათი დაფინანსებული ხალხის მიერ ხდება"

"მათ პარლამენტს რომ წვავდეს ვინმე, რეაგირება არ ექნებათ? მათ რომ უშენდნენ პიროტექნიკას, რეაგირება არ ექნებათ, სამწუხაროდ, ეს ორმაგი სტანდარტიც არ არის, ეს არის უსტანდარტობა იმ ქვეყნის მიმართ, რომელსაც როგორც ჩანს, ვიღაც თავის ტოლად და დარად არ თვლის და დაბალ ღობედ მიიჩნევს. ჩვენს პოლიციელებს, როგორც ჩანს ქვები და „მოლოტოვის კოქტეილები“ უნდა ესროლონ და ეს არის მათი გადმოსახედიდან ნორმალური. ეს არის, რაც საბოლოო ჯამში, იმედგაცრუებას იწვევს მოსახლეობაში. ამას აჩვენებს გამოკითხვებიც, როცა ნდობა ევროკავშირის მიმართ ეცემა იმიტომ, რომ ხედავენ, რომ ზემოდან დაგვყურებენ, როგორც მეორე ხარისხოვან ქვეყანას და ჩვენთან ყველაფერი უნდა იყოს შესაძლებელი, თუ ეს მათი დაფინანსებული ხალხის მიერ ხდება. მნიშვნელოვანია, რომ ამ ქვეყნებმა უსამართლო თავდასხმა შეწყვიტონ საქართველოზე და შეწყვიტონ აგრესიული რიტორიკა საქართველოს წინააღმდეგ", — თქვა პაპუაშვილმა.

შეგახსენებთ, რომ სოციალური კვლევისა და ანალიზის ინსტიტუტის (ISSA) ახალი კვლევის მიხედვით, საქართველოს ევროკავშირში გაწევრების მომხრეა საქართველოს მოსახლეობის 83% , წინააღმდეგია 13%, პასუხი არ აქვს 4%-ს.

თბილისში ევროკავშირში გაწევრიანების მომხრეა 85%, წინააღმდეგია 13%, პასუხი არ აქვს 2%-ს.

რეგიონებში მომხრეა 82%, წინააღმდეგია — 13%, პასუხი არ აქვს 2%-ს.

პროევროპულ ოპოზიციაში მომხრეა 94%, წინააღმდეგია — 4%, პასუხი არ აქვს 3%-ს.

"ქართული ოცების" ამომრჩეველში მომხრეა 68%, წინააღმდეგია 27% და პასუხი არ აქვს 7%-ს.