რუსეთის საგარეო საქმეთა მინისტრი სერგეი ლავროვი ჩრდილოეთ კორეაში ოფიციალური ვიზიტის ფარგლებში ჩრდილოეთ კორეის ლიდერს, კიმ ჩენ ინს შეხვდა.

შეხვედრის შესახებ ინფორმაცია რუსეთის საგარეო საქმეთა სამინისტროს ტელეგრამის არხზე გავრცელდა.

"სერგეი ლავროვი მიიღო კორეის სახალხო დემოკრატიული რესპუბლიკის სახელმწიფო საქმეთა თავმჯდომარემ, კიმ ჩენ ინმა", — ნათქვამია სამინისტროს განცხადებაში.

ეს მოსკოვის მაღალი თანამდებობის პირის ჩრდილოეთ კორეაში მაღალი რანგის ვიზიტების სერიის ბოლო და უახლესი შემთხვევაა, იმ ფონზე, როცა რუსეთ-უკრაინის ომის მიმდინარეობის პერიოდში, ქვეყნები სამხედრო და პოლიტიკურ კავშირებს აღრმავებენ.

ფხენიანი უკრაინის სამ წელზე მეტი ხნის ომის დროს მოსკოვის ერთ-ერთ მთავარ მოკავშირედ იქცა და ათასობით ჯარისკაცი და იარაღი გაგზავნა, რათა კრემლს უკრაინული ძალების კურსკიდან გაყვანაში დახმარებოდა.

ბრიტანული თავდაცვის დაზვერვის ცნობით, რუსეთ-უკრაინის ომში 6000-ზე მეტი ჩრდილოეთ კორეელი ჯარისკაცი დაიღუპა.

ჩრდილოეთ კორეა ასევე დათანხმდა 6000 სამხედრო ინჟინრისა და მშენებლის გაგზავნას რეკონსტრუქციის სამუშაოებში დასახმარებლად.

სამხრეთ კორეის დაზვერვის სამსახურმა განაცხადა, რომ ჩრდილოეთ კორეა შესაძლოა ივლისში ან აგვისტოში დამატებითი ჯარისკაცების განლაგებისთვის ემზადებოდეს.

ამერიკის შეერთებულმა შტატებმა და სამხრეთ კორეამ შეშფოთება გამოთქვეს, რომ სანაცვლოდ კიმმა შეიძლება რუსული ტექნოლოგიების გადაცემა მოითხოვოს, რამაც შეიძლება გააძლიეროს ბირთვული შეიარაღების საფრთხე.

შაბათს, ლავროვი თავის ჩრდილოეთ კორეელ კოლეგას ჩოე სონ ჰუის ვონსანში შეხვდა, სადაც ამ თვის დასაწყისში უზარმაზარი კურორტი გაიხსნა.