შვედეთის საგარეო საქმეთა მინისტრი, მარია მალმერ სტენერგარდი საქართველოში ბოლო დროს განვითარებულ მოვლენებს სოციალურ ქსელში გამოეხმაურა. მისი თქმით, ოპოზიციონერების, სამოქალაქო საზოგადოების წარმომადგენლებისა და მშვიდობიანი მომიტიგნეების დაკავებები საქართველოში დემოკრატიის ჩამოშლას ხელს უწყობს.

"რამდენიმე ევროპელ საგარეო საქმეთა მინისტრთან და კაია კალასთან ერთად, მე საქართველოში მდგომარეობის გაუარესების შესახებ განცხადება გამოვაქვეყნე.

ბოლოდროინდელი ოპოზიციონერი ლიდერების დაპატიმრება — ისევე როგორც სამოქალაქო საზოგადოების წარმომადგენლების, მშვიდობიანი მომიტინგეების და დამოუკიდებელი ჟურნალისტების თვითნებური დაკავებები და მზარდი რეპრესიები — ხელს უწყობს დემოკრატიის დემონტაჟს საქართველოში, რაც ევროპულ ნორმებსა და ღირებულებებს ეწინააღმდეგება.

პარასკევს, 11 ივლისს, საქართველოს საქმეთა დროებითი რწმუნებული შვედეთის საგარეო საქმეთა სამინისტროში იქნა დაბარებული, სადაც მაღალი რანგის ოფიციალურმა პირმა საქართველოში ადამიანის უფლებების მდგომარეობასთან დაკავშირებით სერიოზული შეშფოთება გამოხატა", — დაწერა, მარია მალმერ სტენერგარდმა.

ცნობისთვის, საქართველოში ბრიტანეთის საელჩომ 17 ევროპული ქვეყნის საგარეო საქმეთა მინისტრებისა და ევროპის კავშირის უმაღლესი წარმომადგენლის განცხადება გაავრცელა. სადაც წერია, რომ განაგრძობენ საქართველოს ხელისუფლების ანტიდემოკრატიული ქმედებებისა და ადამიანის უფლებების დარღვევების მხილებას და მზად არიან გამოიყენონ მათ ხელთ არსებული მექანიზმები, თუკი საქართველოს ხელისუფლება გააგრძელებს ქვეყნის დემოკრატიისა და ადამიანის უფლებების პატივისცემის ძირის გამოთხრას.

ევროპელი მინისტრები საქართველოს ხელისუფლებას მოუწოდებენ, "დაუყოვნებლივ გაათავისუფლოს უსამართლოდ დაკავებული პოლიტიკოსები, ჟურნალისტები და აქტივისტები, გააუქმოს რეპრესიული კანონმდებლობა და ჩაერთოს ეროვნულ დიალოგში ყველა შესაბამის მხარესთან რათა მოიძებნოს გამოსავალი არსებული მდგომარეობიდან".

ამავე თემაზე იხილეთ: