აშშ-ის სახელმწიფო დეპარტამენტმა პარასკევს 1 350-ზე მეტი თანამშრომლის გათავისუფლება დაიწო, რაც პრეზიდენტ დონალდ ტრამპის ინიციატივის ნაწილია — მას სურს America First (ამერიკა უპირველეს ყოვლისა) პოლიტიკის ფარგლებში სახელმწიფო უწყებების რადიკალური გადახალისება. გათავისუფლებულებს შორის არიან 1 107 სამოქალაქო სამსახურის და 246 საგარეო სამსახურის ოფიცერი. ამის შესახებ ინფორმაციას Reuters ავრცელებს.

პროცესი იმ ფონზე მიმდინარეობს, როცა მსოფლიო არენაზე გრძელდება კრიზისები რუსეთთან, ჩინეთთან, ირანსა და ისრაელთან, ასევე ღაზაში.

სახელმწიფო დეპარტამენტის შიდა განცხადებაში აღნიშნულია, რომ რეორგანიზაცია მიზნად ნაკლებად მნიშვნელოვანი, დუბლირებული ან არაეფექტური სტრუქტურების შემცირებას და თანამშრომლების რაოდენობის 3 000-მდე შემცირებას ისახავს (გათვალისწინებულია ნებაყოფლობითი წასვლებიც), რაც აშშ-ში მომუშავე დაახლოებით 18 000 თანამშრომლიდან ხდება.

დემოკრატმა სენატორებმა ტიმ კეინმა და კრის ვან ჰოლენმა გადაწყვეტილება შეაფასეს, როგორც ეროვნული უსაფრთხოებისთვის საფრთხის შემცველი. ყოფილი დიპლომატებიც ამბობენ, რომ ამ ნაბიჯით ამერიკის დიპლომატიური პოტენციალი სუსტდება.

პარასკევს დეპარტამენტში ემოციური სცენები განვითარდა — თანამშრომლებმა გათავისუფლებულებისთვის "გამომშვიდობების ტაში" მოაწყვეს. ბევრი ტიროდა და ყუთებით ატარებდა ნივთებს, სხვები კი ტაშს უკრავდნენ და ბანერებს აწერდნენ "გმადლობთ, ამერიკის დიპლომატებო!"

გათავისუფლებულებს დაავალეს, დაებრუნებინათ სამსახურებრივი ბარათები, ტექნიკა და სხვა ქონება. 5-გვერდიანი განთავისუფლების სია მათ აფრთხილებდა, რომ პარასკევს საღამოს 5 საათზე შეუწყდებოდათ წვდომა ელექტრონულ ფოსტასა და შენობებზე.

გეგმით გაუქმდება თანამდებობები და ოფისები, რომლებიც ეხება ცივილურ უსაფრთხოებას, დემოკრატიას, ადამიანის უფლებებსა და ომის დანაშაულების მონიტორინგს. მანამდე, ტრამპის ადმინისტრაციამ USAID გააუქმა და მისი ფუნქციები სახელმწიფო დეპარტამენტში გადაანაწილა.

გადახალისება თავდაპირველად 1 ივლისისთვის უნდა დასრულებულიყო, თუმცა სასამართლო დავებმა პროცესს ხელი შეუშალა. ამ კვირაში უზენაესმა სასამართლომ მასობრივ შემცირებებს მწვანე შუქი აუნთო, რის შემდეგაც თეთრი სახლის იურიდიულმა სამსახურმა და პერსონალის მართვის ოფისმა კანონის შესაბამისად ფედერალური უწყებების მონიტორინგი დაიწყეს.