ევროპის საბჭოს საპარლამენტო ასამბლეის (PACE) საქართველოს მონიტორინგის მომხსენებლებმა, ედიტე ესტრელამ (პორტუგალია, SOC) და საბინე კუდიჩმა (ბოსნია და ჰერცეგოვინა, ALDE) ღრმა შეშფოთება გამოთქვეს საქართველოში ოპოზიციის წევრებისა და სამოქალაქო საზოგადოების წარმომადგენლების პოლიტიკურად მოტივირებული დევნის გამო.

როგორც თანამომხსენებლები განცხადებაში აღნიშნავენ, დაუყოვნებლივ უნდა გათავისუფლდეს უკანონოდ დაკავებული ყველა პირი.

"ჩვენ ვუერთდებით ყველა პოლიტიკური ჯგუფის წარმომადგენლებს ასამბლეაში გუშინდელ მიმდინარე მოვლენებთან დაკავშირებულ დებატებში და გამოვდივართ მოწოდებით — დაუყოვნებლივ გათავისუფლდნენ საქართველოში პოლიტიკურად მოტივირებული დევნის მსხვერპლი ყველა პირი. ეს დევნის შემთხვევები და სამართლებრივი პროცედურების ბოროტად გამოყენება ოპოზიციისა და განსხვავებული აზრის გასაჩუმებლად უნდა დასრულდეს. ისინი შეუთავსებელია დემოკრატიულ საზოგადოებასთან", — განაცხადეს თანამომხსენებლებმა.

მათივე ცნობით, საქართველოს დემოკრატიული უკუსვლის შეჩერებისა და ქვეყნის ყველა დაინტერესებულ მხარესთან ღია დიალოგის გზით, ევროპის საბჭოში წევრობით აღებული ვალდებულებების სრული პატივისცემის უზრუნველყოფის მიზნით, თანამომხსენებლები ამ წლის შემოდგომაზე გეგმავენ საქართველოში ვიზიტს ფაქტების შესწავლის მიზნით.