"ზუსტად გიორგი გახარიას მინისტრობის პირობებში ამ აქციის დაშლა ისეთი მეთოდებით მოხდა, რომელმაც ზიანი მიაყენა მოქალაქეებს", — განაცხად ოცნების პარლამენტის თავმჯდომარემ, შალვა პაპუაშვილმა 20 ივნისის საქმესთან დაკავშირებით, პროკურატურის მიერ საგამოძიებო მოქმედებების წარმოებაზე. მისი თქმით, მნიშვნელოვანია, რომ ეს საქმე გამოძიებული იყოს.

"ჩვენ გვაქვს სტრასბურგის გადაწყვეტილება, რომელიც ქვეყანას ავალდებულებს, რომ ამ საქმის ხელახალი გამოძიება იყოს. შესაბამისად, პროკურატურა ამ საკითხს იძიებს. ის, რომ 2019 წლის 20 ივნისს, პარლამენტზე შტურმი იყო, დაადგინა იმავე სტრასბურგის სასამართლომ და ამავე სასამართლომ დაადგინა, რომ შემდეგ, დაშლის ოპერაციის დროს, გადაცდომებთან დაკავშირებით გამოძიება სრულყოფილი არ იყო. ამიტომ ჩვენ სტრასბურგის სასამართოდან ორი მოცემულობა გვაქვს: ერთი, დადგინდა, რომ ეს იყო შტურმი, რომლის მოტივი და მიზანი საბოლოო ჯამში, ხელისუფლების დამხომა იყო. აბა, პარლამენტს სიამოვნების გამო არავინ შტურმით არ იღებს.

აქვე გავახსენებ ყველას, რომ ევროკავშირი თავად იყო ჩართული იმაში, რომ ამ შტურმის მონაწილეები გარეთ ყოფილიყვნენ. შეგახსენებთ, ნიკა მელიას გირაო ბრიუსელს აქვს გადახდილი, იმ ადამიანის გირაო, რომელიც იმ შტურმში მონაწილეობდა, რომელზეც სტრასბურგმა თქვა, რომ ეს იყო პარლამენტის შტურმი. აქაც კიდევ ერთხელ ისმის კითხვის ნიშნები ბრიუსელის მიმართ, თუ რა პროცესებთან გვქონდა საქმე და რას ახალისებდა. მეორე არის, კანონიერ საზღვარს გამცდარი აქციის დაშლის ოპერაცია და ღონისძიება, ამ საკითხს ახლა პროკურატურა იძიებს. ჩვენ ვნახეთ, რომ ზუსტად გიორგი გახარიას მინისტრობის პირობებში ამ აქციის დაშლა ისეთი მეთოდებით მოხდა, რომელმაც ზიანი მიაყენა მოქალაქეებს, მნიშვნელოვანია, რომ ეს საქმე გამოძიებული იყოს", — განაცხადა ოცნების პარლამენტის თავმჯდომარემ, შალვა პაპუაშვილმა 20 ივნისის საქმესთან დაკავშირებით, პროკურატურის მიერ საგამოძიებო მოქმედებების წარმოებაზე.

გუშინ, 11 ივნისს, პოლიციამ 20 ივნისის, ე.წ. გავრილოვის ღამის საქმეზე საგამოძიებო მოქმედებების დაწყების მიზნით, რუსთაველის გამზირი გადაკეტა. პროკურატურის ცნობით, საგამოძიებო მოქმედებები სტრასბურგის სასამართლოს გადაწყვეტილების და რეკომენდაციების გათვალისწინებით დაიწყო.

შეგახსენებთ, რომ სახალხო დამცველის ანგარიშის მიხედვით, 2024 წლის 28 ნოემბრიდან 2025 წლის 1 მარტამდე მონახულებული 442 პირიდან არასათანადო მოპყრობაზე 267 პირი (60%) მიუთითებდა. მზარდი მტკიცებულებების მიუხედავად, არც ერთი სამართალდამცველი საპროტესტო აქციების დროს ჩადენილი დარღვევებისთვის პასუხისგებაში არ მიუციათ, ნათქვამია ანგარიშში.

ამას გარდა, "მედიის, ინფორმაციისა და სოციალური კვლევების ცენტრის" (CMIS) ინფორმაციით, 2024 წლის 28 ნოემბრიდან ამრტამდე პროევროპულ აქციებზე მედიის წარმომადგენლების უფლებების დარღვევის 147 შემთხვევა დაფიქსირდა. აქედან 24 რეპორტიორი ერთზე მეტჯერ დაშავდა და დაუზიანდა ტექნიკა, ან/და დაშავდა ფიზიკურად, დაჯარიმდა ან საქმე აღიძრა მათ წინააღმდეგ.