მიგრაციის დეპარტამენტისა და სასაზღვრო პოლიციის თანამშრომლებმა საქართველოში სამართლებრივი საფუძვლის გარეშე მყოფი უცხო ქვეყნის 6 მოქალაქე დააკავეს. ამის შესახებ ინფორმაციას შსს ავრცელებს.

უწყების ცნობით, დაკავებულები თურქეთის, ირანის, ერაყის, ნეპალისა და ეგვიპტის მოქალაქეები არიან. შსს-ს ცნობით, ისინი თავშესაფრის პროცედურით ბოროტად სარგებლობდნენ და წლების განმავლობაში არ ტოვებდნენ ქვეყანას.

შინაგან საქმეთა სამინისტროს მიგრაციის დეპარტამენტის მიერ მიღებული იქნა გადაწყვეტილება აღნიშნული პირების დაკავების თაობაზე, რადგან დაკავებულებმა არ ისარგებლეს გაძევების გადაწყვეტილებით განსაზღვრული ვადებით, რაც ქვეყნის ნებაყოფლობით დატოვებას გულისხმობს.

დაკავებულები მიგრაციის დეპარტამენტის დროებით განთავსების ცენტრში არიან და მათი წარმოშობის ქვეყანაში გაძევების პროცედურა მიმდინარეობს, — ნათქვამია უწყების მიერ გავრცელებულ ინფორმაციაში.