ოცნების ხელისუფლების საგარეო საქმეთა მინისტრმა, მაკა ბოჭორიშვილმა ევროკავშირის 17 ქვეყნის საგარეო მინისტრებისა და უმაღლესი წარმომადგენლის ერთობლივ განცხადებას "ცრუ ნარატივების" გამავრცელებელი უწოდა. მისი თქმით, განცხადებები, რომლებიც არჩევნებს სამართლებრივ პროცესებთან აკავშირებს, მიზნად საქართველოს დისკრედიტაციას ისახავს და გადაფარავს მიხეილ ყაველაშვილის მოწოდებას თავისუფალი არჩევნების უზრუნველსაყოფად.

"მსგავსი განცხადებები კიდევ ერთხელ ხელს უწყობს საქართველოზე ცრუ ნარატივების გავრცელებას. ეს წერილი ერთგვარად გადაფარვაა იმ განცხადების, რომელიც გაკეთდა პრეზიდენტის მიერ და რომელიც მიმართული იყო სწორედ იმისკენ, რომ არჩევნებს არაფერმა შეუქმნას საფრთხე, არჩევნებთან დაკავშირებით არ არსებობდეს რაიმე შემაფერხებელი გარემოებები, თუ კი ქართული პოლიტიკური სპექტრისთვის ეს მნიშვნელოვანია და თუ მათთვის საერთოდ არის მნიშვნელოვანი არჩევნებში მონაწილეობა, არჩევნების გზით დემოკრატიის ნაწილად ყოფნა. პრეზიდენტის მხრიდან ეს განცხადება გაკეთებულია, ეს არის ქართული პოლიტიკური პროცესის შემადგენელი ნაწილი. განცხადებები, რომელიც ჩვენ გვესმის, სადაც გაკეთებულია აპელირება არჩევნებზეა და ისინი დაკავშირებულია სამართლებრივ პროცესებთან, ერთადერთ რამეს ემსახურება, რომ კიდევ ერთხელ გავრცელდეს და გამყარდეს ცრუ ნარატივები საქართველოს შესახებ", — განაცხადა მაკა ბოჭორიშვილმა.

საქართველოსთან დაკავშირებით 17 ქვეყნის საგარეო საქმეთა მინისტრმა და ევროკავშირის უმაღლესმა წარმომადგენელმა ერთობლივი განცხადება გაავრცელეს, რომელშიც საქართველოს ხელისუფლებას მოუწოდებენ, დაუყოვნებლივ გაათავისუფლონ უსამართლოდ დაკავებული პოლიტიკოსები, ჟურნალისტები და აქტივისტები, გააუქმონ რეპრესიული კანონმდებლობა და ჩაერთონ ეროვნულ დიალოგში ყველა შესაბამის მხარესთან.

ამავე თემაზე იხილეთ:

მარგუს ცაჰკნა: 18 ევროპელი საგარეო საქმეთა მინისტრი მკაცრად გმობს საქართველოს ავტორიტარიზმისკენ სვლას