თელ-ავივის უნივერსიტეტის მეცნიერებმა ჟურნალისტებს მსოფლიოში პირველი 3D გული აჩვენეს, რომელიც ადამიანის უჯრედებისა და სისხლძარღვებისგან შედგება. მართალია, წარმოდგენილი მოდელი კურდღლის გულის ზომისაა, თუმცა პროექტზე მომუშავე მკვლევრებს სჯერათ, რომ ერთ დღესაც გადანერგვისთვის გამოსადეგ გულსაც შექმნიან.

ნაშრომი ჟურნალ Advanced Science-ში გამოქვეყნდა.

კვლევის ხელმძღვანელის, ტალ დვირის თქმით, "ეს პირველი შემთხვევაა ისტორიაში, როცა მეცნიერებმა ამ ორგანოს რეალური რეპლიკა დაბეჭდეს. 3D პრინტერის გამოყენებით გულის სტრუქტურა აქამდეც გაუმეორებიათ, თუმცა - ადამიანური უჯრედების, სისხლძარღვებისა და პარკუჭების გარეშე".

ფოტო: Amir Levy / Getty Images

დაბეჭდვის პროცესი მოიცავს იმ ცხიმოვანი ქსოვილის ბიოფსიას, რომელიც ჩვენს ორგანოებს გარს აკრავს. მეცნიერები უჯრედებს ქსოვილისგან აცალკევებენ და ღეროვან უჯრედებად აპროგრამებენ, რომელთაც გულის უჯრედებად გარდაქმნა შეუძლიათ. უჯრედების შემაერთებელ არაუჯრედოვანი მატრიცას კი პერსონალიზებულ ჰიდროგელად გარდაქმნიან, რომელიც საბეჭდი მელნის ფუნქციას ასრულებს.

უჯრედებისა და ჰიდროგელის გამოყენებით ჯერ სისხლძარღვებით დაქსელილი გულის უბნები იქმნება, მერე კი - მთელი გული.

"ჯერჯერობით ჩვენ მიერ შექმნილი გული მცირეა, თუმცა დიდ გულსაც მსგავსი ტექნოლოგია სჭირდება", - განაცხადა ტალ დვირმა.

გულსისხლძარღვთა დაავადებები განვითარებულ ქვეყნებში სიკვდილის ყველაზე გავრცელებული მიზეზია. მნიშვნელოვანია ისიც, რომ 3D ასლის შესაქმნელად პაციენტის უჯრედების გამოყენება ორგანოს უარყოფის შანსს მინიმუმამდე დაიყვანს.

შემდეგი ეტაპი გულის "გაწვრთა" იქნება. როგორც მეცნიერები ამბობენ, უჯრედებმა ტუმბვა უნდა ისწავლონ. მათ შეკუმშვა უკვე შეუძლიათ, თუმცა სისხლის ცირკულაციისათვის მხოლოდ ეს მოძრაობა საკმარისი არაა.

წარმატების შემთხვევაში პროექტზე მომუშავე გუნდი 3D პრინტერით დაბეჭდილ გულს ჯერ ცხოველებს გადაუნერგავს, შემდეგ კი - ადამიანებს.

"შეიძლება ათ წელიწადში ასეთი პრინტერები ყველა საავადმყოფოში ნახოთ, ეს პროცედურა კი სრულიად ჩვეულებრივი რამ გახდეს", - თქვა დვირმა.