სამეფო კარის თამაშები, სოპრანოს კლანი, სექსი დიდ ქალაქში... ჩვენი საყვარელი სერიალების ყურება მალე ოფიციალური პლატფორმიდან შეგვეძლება.

საუკეთესო სერიალები და ფილმები, რომელთა ნახვა აქამდე მხოლოდ ნაწილობრივ იყო შესაძლებელი, უკვე ოფიციალურად შემოდის საქართველოში: HBO Max ივლისიდან საქართველოშიც გაეშვება.

Warner Bros. Discovery-მ დაადასტურა, რომ მათი საერთაშორისო სტრიმინგ პლატფორმა — HBO Max — მიმდინარე წლის ივლისიდან ხელმისაწვდომი გახდება 12 ახალ ქვეყანაში, მათ შორის საქართველოშიც. სიაში შედიან: ალბანეთი, სომხეთი, კვიპროსი, ესტონეთი, ისლანდია, ყაზახეთი, ყირგიზეთი, ლატვია, ლიტვა, მალტა და ტაჯიკეთი.

ეს ნიშნავს, რომ ქართველი მაყურებელი სულ მალე ოფიციალურად მიიღებს წვდომას ისეთ პოპულარულ შოუებზე, როგორებიცაა:

The Last of Us,
The White Lotus,
Peacemaker,
The Sopranos,
Sex and the City,
The Big Bang Theory,
Friends,
და, რა თქმა უნდა, ჰარი პოტერის ფილმები.

ფოტო: HBO

ასევე, მაყურებელს ექნება შესაძლებლობა უყუროს უახლეს ექსკლუზიურ პროექტებს, მათ შორის მომავალ სერიალებს Task და IT: Welcome to Derry, ასევე ჰიტ ანიმაციის ადაპტაციას – A Minecraft Movie.

საქართველოში HBO Max-ის ორი ტიპის სააბონენტო პაკეტით იქნება ხელმისაწვდომი:

სტანდარტული პაკეტი – რომლის ღირებულება თვეში €9.99 ან წელიწადში €99.90 იქნება. ამ პაკეტით სტრიმინგი ერთდროულად ორ მოწყობილობაზეა შესაძლებელი, ფილმებისა და სერიალების სრულ, HD ხარისხით ყურების ფუნქციითა და 30-მდე გადმოწერის შესაძლებლობით.

პრემიუმ პაკეტი – რომლის ღირებულებაც თვეში €11.99 ან წელიწადში €119 იქნება. ამ პაკეტის მფლობელებს სტრიმინგი ერთდროულად ოთხ მოწყობილობაზე შეეძლებათ, 4K ხარისხში, 100-მდე შოუსა და ფილმის გადმოწერის შესაძლებლობით.

გადახდა შესაძლებელი იქნება Visa, Mastercard, Amex, PayPal-ის მეშვეობით, ან პირდაპირ აპლიკაციიდან (Apple App Store, Google Play Store და Samsung Checkout).

ფოტო: HBO

HBO Max სპორტულ კონტენტსაც შემოგვთავაზებს — შერჩეულ ქვეყნებში პლატფორმა გადასცემს ჩოგბურთის დიდი სლემის ტურნირებს (Australian Open, Roland-Garros, Wimbledon, US Open), ველოსპორტის გრანდ ტურებს (Tour de France, La Vuelta, Giro d’Italia) და ზამთრის სპორტულ ღონისძიებებს. საქართველოს შემთხვევაში კონკრეტული სპორტული შინაარსის ხელმისაწვდომობა მოგვიანებით დაზუსტდება.

Warner Bros. Discovery-ის გლობალური სტრიმინგისა და თამაშების განყოფილების ხელმძღვანელმა, ჯეიბი პერეტმა განაცხადა: "ეს 12 ქვეყანა მხოლოდ დასაწყისია. ჩვენი მიზანია, HBO Max გახდეს გლობალური სტრიმინგის ეპიცენტრი საუკეთესო გასართობი შინაარსისთვის."

ასე რომ, თუ უკვე გგონია, რომ ყველა სერიალი ნახე — მოემზადე, რადგან ამ ზაფხულს შენი საყვარელი შოუები ერთ სრულყოფილ და ხარისხიან პლატფორმაზე გელოდებიან.

დამატებითი ინფორმაციისთვის HBO-ს წარმომადგენელსაც დავუკავშირდით და მათ ოფიციალურ კომენტარსაც შემოგთავაზებთ.