პარტია გახარია საქართველოსთვის დეპუტატებს, სხდომების არასაპატიო მიზეზით გაცდენის გამო, პარლამენტის წევრის უფლებამოსილება შეუწყდათ.

დეპუტატობის მანდატი მოეხსნა 12 დეპუტატს — გიორგი გახარიას, თეონა აქუბარდიას, ანა ბუჩუკურს, ლევან გოგიჩაიშვილს, ზაზა თავაძეს, ბექა ლილუაშვილს, ნათია მეზვრიშვილს, ბერდია სიჭინავას, კახა ქემოკლიძეს, როინ ქოჩორაშვილს, დიმიტრი ცქიტიშვილს და ზვიად ძიძიგურს.

ამის შესახებ პარლამენტის თავმჯდომარემ, შალვა პაპუაშვილმა ბიუროს სხდომაზე ისაუბრა.

"გვაქვს პარტიის საქართველოსთვის პარლამენტის 12 წევრის უფლებამოსილების შეწყვეტის შესახებ საკითხი. საგაზაფხულო სესიაზე ჩატარდა 26 პლენარული სხდომა. მათ 26-ვე არასაპატიო მიზეზით აქვთ გაცდენილი, შესაბამისად, შეიძლება ითქვას, რომ თავის თავს თავადვე უწყვეტენ მანდატს იმით, რომ არ ასრულებენ იმ მანდატს, რომელიც მათ მიიღეს არჩევნებში. აქვე მოგახსენებთ, რომ ამ მოწვევის პარლამენტის განმავლობაში, ანუ 26 ოქტომბრის შემდეგ, პარტიას საქართველოსთვის დაახლოებით, 800 000 ლარი პარტიული დაფინანსება აქვს მიღებული ისე, რომ ერთი დღეც არ გაუტარებიათ პარლამენტში. შეგახსენებთ რეგულაციას, რომ მანდატების შეწყვეტის შემთხვევაში, პარტიას 6 თვით შეუჩერდება პარტიული დაფინანსება," — განაცხადა პაპუაშვილმა.

პარტიას გახარია საქართველოსთვის ბიუჯეტიდან დაფინანსებას მომდევნო ექვსი თვის განმავლობაში ვერ მიიღებს.

ასევე, დღეს პარტია გახარია საქართველოსთვის ლიდერი გიორგი გახარია წულუკიანის საგამოძიებო კომისიას ონლაინ ჩართვით დაესწრება. ის ე.წ. ჩორჩანას ეპიზოდთან დაკავშირებით განმეორებით გამოსაკითხად 23 ივნისს დაიბარეს, მაგრამ უცხოეთში ვიზიტის გამო გახარიამ კომისიას ონლაინ-ჩართვა შესთავაზა, რაზეც წულუკიანის კომისიამ თავდაპირველად უარი განაცხადა, თუმცა მოგვიანებით გახარიას კომისიის სხდომაზე ონლაინ-ჩართვის უფლება მისცეს, იმ მოთხოვნით, რომ ის სხდომაზე ჩართვისთვის ტექნოლოგიურად და ლოჯისტიკურად უზრუნველყოფს.