ქართულ ოცნების სისხლის სამართლის საპროცესო კოდექსში ცვლილებებით, ფარულ და ოპერატიულ საგამოძიებო მოქმედებებში მონაწილე პირების ვინაობას პროკურატურა არ გაამხელს.

განმარტებით ბარათში ვკითხულობთ, რომ ამ ცვლილების მიზანია გამოძიებაში ჩართული პირის "სიცოცხლის, ჯანმრთელობის, მასთან დაკავშირებული პირების უსაფრთხოების დაცვა. მეორე მხრივ გაზრდის გამოძიებასთან თანამშრომლობის პროცესის კონფიდენციალურობის ხარისხს".

ცვლილებებით აღნიშნულ პირებს აღარ მოუწევთ სასამართლო პროცესზე გამოცხადება და ისინი დისტანციურად დაიკითხებიან ისე, რომ დაცვის მხარემ ვერ მოახდინოს მისი იდენტიფიცირება. საგამოძიებო საქმეებში ჩართული პირის ვინაობა მხოლოდ პროკურატურის წარმომადგენლებს და საქმის მოსამართლეს ეცოდინება.

"ოპერატიულ-სამძებრო ღონისძიებაში ან ფარულ საგამოძიებო მოქმედებაში მონაწილე პირი, რომელიც თანამშრომლობს გამოძიების ორგანოსთან და რომლის ვინაობა პროკურორის გადაწყვეტილებით დაფარულია, მოწმედ დაიკითხება დისტანციურად, იმგვარად რომ დაცული იყოს დაცვის მხარის მიერ მისი იდენტიფიცირების ან/და ამოცნობის შესაძლებლობა," — ვკითხულობთ განმარტებით ბარათში.

განმარტებით ბარათში ვკითხულობთ, რომ ცვლილება ნაკლებად მძიმე კატეგორიის დანაშაულებსაც შეეხება, თუ საუბარია ორგანიზებული დანაშაულისა და კორუფციის წინააღმდეგ ბრძოლას.

"ფარული საგამოძიებო მოქმედება უმეტესად ტარდება მძიმე და განსაკუთრებით მძიმე
დანაშაულების გამოსავლენად და ნაკლებად მძიმე კატეგორიის მხოლოდ ცალკეული დანაშაული ექცევა დაფარვის ქვეშ, ყველაზე ხშირად კი მნიშვნელოვანი მტკიცებულებაა ორგანიზებული დანაშაულისა და კორუფციის წინააღმდეგ ბრძოლაში, შესაბამისად მომეტებულია მხილებაზე დამნაშავეთა მხრიდან საპასუხო ნეგატიური გავლენების რისკი და მეტად მოწყვლადს ხდის ამ ღონისძიებაში ჩართული პირის, ასევე მისი ოჯახის წევრების უსაფრთხოებას. დანაშაულის გახსნის, პრევენციის და მტკიცებულებათა მოპოვების საზოგადოებრივი ინტერესისთვის მნიშვნელოვანია სახელმწიფოს ჰქონდეს ქმედითი მხილების ეს მექანიზმი, რასაც ხელს შეუწყობს მოთანამშრომლე პირთა საჯაროობის და ცნობადობის შემცირება," — ვკითხულობთ დოკუმენტში.

იურისტი საბა ბრაჭველის განმარტებით, კანონპროექტში ეს ცვლილება დაცვის მხარეს არ აძლევს უფლებას გადაამოწმოს პროკურატურა "ერთ ცრუ მოწმეს ხომ არ იყენებენ ყველა საქმეში". იურისტის განმარტებით ამ ცვლილებით "ოცნება" ზრდის ნარკოტიკების "ჩადების" მასიურ რისკს და დასძინა, რომ ამ სასამართლო სხდომებს "ვეღარც ჟურნალისტები გააშუქებენ, ვეღარც კამერები გადაიღებენ".

"მატერიალურ კოდექსში ხომ ცალკე შემოიტანეს 6 ( ე ქ ვ ს ) წლამდე ციხე ხუთი გრამი მარიხუანას ფლობისთვის, მაგრამ საპროცესო კოდექსში კიდევ უარესი ქნეს. ახალი ცვლილებებით სრულად საიდუმლოვდება საკვანძო მოწმეების ვინაობა, რომელსაც ბრალდება და გამამტყუნებელი განაჩენი შეიძლება დაეყრდნოს.

კერძოდ, იმ პირ(ებ)ის ვინაობა, ვინც გამოძიებასთან თანამშრომლობს, შეიძლება დაიფაროს გამოძიების ყველა მასალაში, საპროცესო დოკუმენტში, სამართალწარმოების ნებისმიერ ეტაპზე. მისი ვინაობა არსად არ მიეთითება, შეუძლებელი იქნება მისი ამოცნობა, სასამართლო დარბაზში დაკითხვა. ეს ნიშნავს, რომ გამამტყუნებელი განაჩენი შეიძლება დაეყრდნოს ისეთ მთავარ მტკიცებულებას — მოწმის ჩვენებას, ვისი ვინაობაც არავინ იცის პროკურორის და მოსამართლის გარდა, ვისი გამოკვლევის უფლება დაცვის მხარეს არ მისცემია და დაცვის მხარეს ელემენტარულად იმის გადამოწმებაც კი არ შეუძლია, ერთ ცრუ მოწმეს ხომ არ იყენებენ ყველა საქმეში (რაშიც აქამდე შსს არაერთხელ გამოუჭერიათ).

ეს არ არის ნარკოპოლიტიკის გამკაცრება, ეს არის სისტემის შემზადება ნარკოტიკების მასიური ჩადებებისთვის, რომელსაც ვეღარც ჟურნალისტები გააშუქებენ, ვეღარც კამერები გადაიღებენ და ახლა უკვე — ვეღარც თვითონ დაცვის მხარე გამოიკვლევს სათანადოდ. ეს არის ქოცების მართლმსაჯულება და ვისაც ეს წესები მოგწონთ, ამავე კანონებით განსჯა მისურვებია," — წერს ბრაჭველი.

აღნიშნული კანონპროექტი "ოცნების" პარლამენტმა 1 ივლისს, დაჩქარებული წესით I მოსმენით მიიღო.