ივნისში მსოფლიოში პრაიდის თვე აღინიშნა. ლგბტქ ადამიანების ხილვადობისა და სხვა უფლებების დასაცავად არაერთ ქვეყანაში მასშტაბური მსვლელობები თუ სხვა სახის ღონისძიებები გაიმართა.

საგანგებოდ წლევანდელი პრაიდისთვის, ვიდეორგოლი შექმნა ნორვეგიულმა ლგბტქ ორგანიზაციამ, ოსლო პრაიდმა. ორწუთიანი ვიდეო, სახელწოდებით TRYGG (ნორვ. "უსაფრთხო"), გვიჩვენებს, თუ რატომ გვჭირდება პრაიდის აღნიშვნა და რამხელა დატვირთვა შეიძლება ჰქონდეს ისეთ უბრალო ჟესტსაც კი, როგორიც, მაგალითად, ცისარტყელას ფერებით შექმნილი სამაჯურის ტარებაა.

ვიდეორგოლის სიუჟეტში ვხედავთ სხვადასხვა სიტუაციაში აღმოჩენილ ქვიარ ადამიანებს, რომლებიც სწორედ ასეთი ჟესტებით იაზრებენ, რომ უსაფრთხო სივრცეში არიან.

"დღეს ბევრს საუბრობენ, რა დატვირთვა აქვს ცისარტყელას ფერებს", — წერს ოსლო პრაიდი, — "პასუხი მარტივია: ესაა იმის ჩვენება, თუ ვინ ხარ ან ვის უჭერ მხარს. ეს არაა მხოლოდ დეკორაცია. ეს ნიშნავს, რომ აქ შენი ადგილია და უსაფრთხოდ ხარ".

ვიდეორგოლს სოციალურ ქსელებში დიდი გამოხმაურება მოჰყვა. ინტერნეტმომხმარებლები წერენ, რომ აქამდე არ უფიქრიათ, თუკი ცისარტყელას ასეთი მნიშვნელობაც შეიძლება ჰქონდეს. ისინიც კი, ვინც ლგბტქ თემს თავს არ მიაკუთვნებს, კომენტარებში აღნიშნავენ, რომ ამიერიდან თავადაც ატარებენ მსგავს აქსესუარებს, რათა ქვიარ ადამიანებს აჩვენონ, რომ მათთან ერთად უსაფრთხოდ არიან.

"სასწრაფო დახმარების ექთანი ვარ და ყველა ცვლაზე ამ გულსამაგრს ვატარებ — 'შენ ჩემთან უსაფრთხოდ ხარ'", — წერს Threads-ის მომხმარებელი.