"პენ საქართველო" და "Pen international" ქართველი პოეტისა და მთარგმნელის, ზვიად რატიანის დაკავებასთან დაკავშირებით განცხადებას ავრცელებენ და აღნიშნავენ, რომ ოცნების ხელისუფლება სწრაფი ტემპით ზღუდავს ადამიანის ფუნდამენტურ უფლებებს.

"ზვიად რატიანს დაუსაბუთებლად მკაცრი სასჯელი ელის განსხვავებული მოსაზრებების გამო. ჩვენ მამაცი ქართველი ხალხთან ერთად ვართ მაშინ, როცა ხელისუფლება საგანგაშოდ სწრაფი ტემპით ზღუდავს ადამიანის ფუნდამენტურ უფლებებს," — განაცხადა მა თიდამ, PEN International-ის კომიტეტის "მწერლები ციხეში" თავმჯდომარემ.

"პენ საქართველო" და "Pen international" ზვიად რატიანის წინასწარი პატიმრობიდან გათავისუფლებას მოითხოვენ.

"საქართველოს ხელისუფლებამ დაუყოვნებლივ უნდა გაათავისუფლოს ცნობილი პოეტი და მთარგმნელი ზვიად რატიანი წინასწარი პატიმრობიდან და უზრუნველყოს მისი უფლება სამართლიან სასამართლოზე," — ნათქვამია განცხადებაში.

განცხადებას Pen America-ც შეუერთდა. ისინი აღნიშნავენ, რომ საქართველოს ხელისუფლებამ დაუყოვნებლივ უნდა გაათავისუფლოს პოეტი და მთარგმნელი ზვიად რატიანი და უზრუნველყოს მისი უფლება სამართლიან სასამართლოზე.

ცნობისთვის, ზვიად რატიანს ბრალი საქართველოს სისხლის სამართლის კოდექსის 353(1)-ე მუხლით წარუდგინეს (პოლიციის, სპეციალური პენიტენციური სამსახურის თანამშრომლის ან სხვა სახელმწიფო ორგანოს წარმომადგენელზე თავდასხმა), რაც ოთხიდან შვიდ წლამდე თავისუფლების აღკვეთას გულისხმობს. 2025 წლის 25 ივნისს, თბილისის საქალაქო სასამართლომ რატიანი წინასწარ პატიმრობაში დატოვა და გლდანის ციხეში გადაიყვანა, სადაც ის ამ დრომდე რჩება.