"გუშინ გაიმართა ძალიან მნიშვნელოვანი შეხვედრა ბრიტანეთის სახელმწიფო მინისტრის ორგანიზებით, სადაც მონაწილეობდნენ უმაღლესი თანამდებობის პირები, მათ შორის საფრანგეთის ევროპის საქმეთა მინისტრი. შეხვედრაზე ძალიან მკაფიოდ ითქვა, რომ ჩვენი საერთაშორისო პარტნიორებისთვის მიუღებელია ის კურსი, რა კურსიც საქართველოს ე.წ. ხელისუფლებამ აირჩია" — ამის შესახებ ნაციონალური მოძრაობის ერთ-ერთმა ლიდერმა, ანა წითლიძემ ჟურნალისტებთან საუბრისას განაცხადა.

მისი თქმით, ძალიან მკაფიოდ ითქვა, რომ გზას, რომლითაც მიდის ოცნება, არანაირი კავშირი არ აქვს დემოკრატიასთან, ეს არის დიქტატურის გაძლიერება და ამას მოჰყვება კონკრეტული ნაბიჯები.

ანა წითლიძის განცხადებით, "ოცნებას სახელმწიფო აქვს მიტაცებული და ცხადია, რომ საერთაშორისო პარტნიორების რეაგირება კიდევ უფრო მკაცრი იქნება".

"გუშინ იყო ძალიან მნიშვნელოვანი შეხვედრა ბრიტანეთის ორგანიზებით საქართველოსთან დაკავშირებით. ეს იყო საკოორდინაციო შეხვედრა, რომელიც გაიმართა ბრიტანეთის სახელმწიფო მინისტრის ორგანიზებით. შეხვედრაზე მონაწილეობდნენ უმაღლესი თანამდებობის პირები, მათ შორის საფრანგეთის ევროპის საქმეთა მინისტრი. ძალიან მკაფიოდ ითქვა, რომ ჩვენი საერთაშორისო პარტნიორებისთვის, ევროპელებისთვის, რომლებიც საქართველოს დამოუკიდებლობის დღიდან საქართველოს დამოუკიდებლობის მთავარი მხარდამჭერები არიან, რომ ამ ადამიანებისთვის მიუღებელია ის კურსი, რა კურსიც აირჩია საქართველოს ე.წ. ხელისუფლებამ.

ძალიან მკაფიოდ ითქვა, რომ ამ გზას, რომლითაც მიდის ოცნება, არანაირი კავშირი არ აქვს დემოკრატიასთან, ეს არის დიქტატურის გაძლიერება და ამას მოჰყვება კონკრეტული ნაბიჯები.

მსგავსი ტიპის მაღალი დონის შეხვედრების ორგანიზება როდესაც ხდება ბრიტანელების მხრიდან, მას ყოველთვის მოჰყვება კონკრეტული ნაბიჯები, განსაკუთრებით თუ გავითვალისწინებთ, რომ რამდენიმე დღის წინ ასევე ბრიტანეთის საელჩომ სპეციალური გზამკვლევი გამოაქვეყნა სანქციებთან დაკავშირებით, რომელიც ბიზნესმენებს ეხებოდათ.

ეს პროცესი დაკავშირებულია ყველაფერი იმასთან, რასაც ოცნება ამ ქვეყანაში აკეთებს — საქართველოს მოქალაქეების, პოლიტიკური ლიდერების დაკავება, საქართველოს მოქალაქეების წამება, სახელმწიფო აქვთ მიტაცებული და ცხადია, რომ ჩვენი საერთაშორისო პარტნიორების რეაგირება იქნება კიდევ უფრო მკაცრი.

აღსანიშნავი და საგულისხმოა ბრიტანეთის სანქციები და საფრანგეთის სანქციები, რომლებიც უშუალოდ უნდა დაეკისროს ოცნების ლიდერებს და ივანიშვილს", — განაცხადა ანა წითლიძემ. კომენტარს პარტიის პრესსამსახური ავრცელებს.

ცნობისთვის, 1-ელ ივლისს ევროპის საკითხებში გაერთიანებული სამეფოს სახელმწიფო მინისტრ სტივენ დაუთის ინიციატივით საქართველოში არსებულ მდგომარეობასთან დაკავშირებით საკოორდინაციო შეხვედრა გაიმართა, რომლის შესახებაც ინფორმაციას ევროპის საკითხებში საფრანგეთის მინისტრის ბენჟამინ ჰადადი ავრცელებს.

ასევე იხილეთ:

• ბენჟამინ ჰადადი: სტივენ დაუთის ინიციატივით საქართველოში არსებულ მდგომარეობასთან დაკავშირებით საკოორდინაციო შეხვედრა გაიმართა