საქართველოს პრეზიდენტმა გიორგი მარგველაშვილმა საგანგებო ბრიფინგზე განაცხადა, რომ საკონსტიტუციო ცვლილებებთან დაკავშირებით ოც პოლიტიკურ პარტიას კონსენსუსი შედგა. პრეზიდენტის თქმით, პარტიები ბევრ საკითხში განსხვავდებიან ერთმანეთისგან, მაგრამ თანხმობის მისაღწევად ყველამ "რაღაც დათმო":

"ჩვენ დავიწყეთ მუშაობა ქართული ოცნების მიერ შემუშავებულ კონსტიტუციის პროექტზე, და ვთქვით, რომ ამ პროექტში შევიტანთ მხოლოდ იმ ცვლილებებს, რომელსაც აბსოლუტურად ყველა პოლიტიკური პარტია უჭერს მხარს."

მისი თქმით, სრული შეთანხმება შედგა საპარლამენტო და საპრეზიდენტო საარჩევნო სისტემებზე, სასამართლოს რეფორმირებაზე, პარლამენტის საზედამხედველობო ფუნქციების გაძლიერებაზე, უსაფრთხოების საკითხებსა და უსაფრთხოების საბჭოს თემაზე.

როგორც პრეზიდენტი ამბობს, ამ დოკუმენტს ქართულ ოცნებასა და ვენეციის კომისიას გადაუგზავნიან.

"იმედი მაქვს, რომ ეს დოკუმენტი უბიძგებს საპარლამენტო უმრავლესობას, რომ გადახედოს თავის უკომპრომისო პოზიციას."

მისივე თქმით, მითი იმისა, რომ საქართველოში განსხვავებული მოსაზრების მქონე ადამიანები ვერ თანხმდებიან, ნამდვილად დამსხვრეულია.

რამდენიმე დღის წინ საქართველოს პრეზიდენტმა ოპოზიციური პარტიების წარმომადგენლებს საკონსტიტუციო ცვლილებების არსებულ დოკუმენტზე მუშაობა შესთავაზა. მისი თქმით, ქართული სახელმწიფოს იმიჯი შეილახა იმ შთაბეჭდილების შექმნით, რომ საზოგადოებას არ შეუძლია შეთანხმება უმნიშვნელოვანეს საკითხზე.

მანამდე, 16 აგვისტოს ოპოზიციურმა პოლიტიკურმა პარტიებმა საკონსტიტუციო რეფორმის პროცესში კონსენსუსის მიღწევასთან დაკავშირებით ერთობლივი განცხადება გაავრცელეს, რომლის მიხედვითაც ქართულ ოცნებას დიალოგს სთავაზობდნენ.

1 სექტემბერს ცნობილი გახდა, რომ საპარლამენტო უმრავლესობა ვენეციის კომისიასთან შესახვედრად აღარ გაემგზავრებოდა. მათი თქმით, ოპოზიციამ დიალოგი "ჩიხში" შეიყვანა, რის გამოც ქვეყნის გარეთ კონსულტაციებმა აზრი დაკარგა.