მოკლედ: შინაგან საქმეთა მინისტრი ვახტანგ გომელაური აცხადებს, რომ რუსული კანონის საწინააღმდეგო აქციის მონაწილეები, სამართალდამცავების მიმართ აგრესიულები იყვნენ.

  • მის განცხადებას დარბაზში პროტესტი მოჰყვა.

დეტალები: შს მინისტრის თქმით, ორგანიზატორები და მონაწილეები ცდილობდნენ პოლიციელების გამოწვევას და მათთან კონფლიქტში შესვლას.

  • "ისინი, ასევე, ცდილობდნენ ადმინისტრაციულ შენობაში შეჭრას, ისმოდა მოწოდებები, რომ შტურმით აეღოთ მთავრობის კანცელარიის შენობა, აწვებოდნენ და სიტყვიერ შეურაცხყოფას აყენებდნენ პოლიციელებს, განსაკუთრებით აქტიურობდნენ ოპოზიციური პარტიების წარმომადგენლები, აღარ დავასახელებ აქ სახელებსა და გვარებს" — თქვა გომელაურმა.

მისი განცხადებაზე პასუხი დარბაზიდან სალომე სამადაშვილმა სცადა, თუმცა შალვა პაპუაშვილმა მანდატურის სამსახურს სთხოვა, დეპუტატი დარბაზიდან გაეყვანათ.

ამის შემდეგ კი ტექნიკური შესვენება გამოცხადდა.

როგორ შეაფასა სახალხო დამცველმა აქციები:

17 აპრილს სახალხო დამცველმა ლევან იოსელიანმა 16-17 აპრილის აქციის მონიტორინგის პირველადი შედეგების შესახებ დოკუმენტი გამოაქვეყნა.

ომბუდსმენის აპარატი წერს, რომ აქციების დროს მშვიდობიანი შეკრების თავისუფლებაში უსაფუძვლო ჩარევის შემთხვევები გამოვლინდა.

  • ომბუდსმენის შეფასებით, 16 აპრილის საღამოს საათებში, აქციის მიმდინარეობისას, სიტუაცია რამდენჯერმე დაიძაბა, რა დროსაც სამართალდამცავების მხრიდან მომიტინგეთა არაძალადობრივი მიახლოების შემთხვევაშიც ხდებოდა ე.წ. წიწაკის სპრეის გამოყენება.
  • ომბუდსმენის აპარატი აცხადებს, რომ მასობრივი ინფორმაციის საშუალებებით გავრცელებულ კადრებში აშკარად იკვეთება სპეციალური დანიშნულების რაზმის მხრიდან მოქალაქეების მიმართ არაპროპორციული ძალის გამოყენება.

"შემაშფოთებელია აქციაზე ცალკეული ჟურნალისტების მიმართ განხორციელებული ფიზიკური ძალადობის ფაქტები, ასევე ტელეკომპანია იმედის ჟურნალისტებისთვის საქმიანობის ხელშეშლის ფაქტი", — წერია დოკუმენტში.

  • "გავრცელებული ინფორმაციით, სპეციალური დანიშნულების რაზმის თანამშრომლები ფიზიკურად გაუსწორდნენ გამოცემა პუბლიკას ჟურნალისტს ალექსანდრე ქეშელავას და წაართვეს ტელეფონიც, რომელიც მოგვიანებით დაუბრუნეს.
  • გავრცელებულ ვიდეო კადრში ნათლად ჩანს, როგორ ურტყამენ ჟურნალისტს.
  • ასევე, ვრცელდება ინფორმაცია ტაბულას ჟურნალისტზე, გიორგი ბადრიძეზე ფიზიკური ძალადობის და ტელეფონის წართმევის და აპრილი მედიის ჟურნალისტის, გიორგი ბასხაჯაურის ცემისა და სიტყვიერი შეურაცხყოფის თაობაზე", — წერს ომბუდსმენი.

კონტექსტი: ბოლო რამდენიმე დღეა, რაც საქართველოში ხალხი რუსული კანონის მიღებას აპროტესტებს საკანონმდებლო ინიციატივის საპარლამენტო განხილვების პარალელურად.

  • აქციები არა მხოლოდ თბილისში, სხვა რეგიონებშიც იმართება.

17 აპრილს, მთავრობის ადმინისტრაციასთან აქციის მონაწილეებსა და პოლიციელებს შორის დაპირისპირება მოხდა.

  • საქართველოს პარლამენტთან, რუსული კანონის გასაპროტესტებლად შეკრებილი მოქალაქეები, კანცელარიასთან ავიდნენ იმ მიზნით, რომ ირაკლი კობახიძესთან შეხვედრა მოეთხოვათ.
  • შინაგან საქმეთა სამინისტრომ კანცელარიასთან 2 პირი დააკავა.
  • ტვ პირველმა განაცხადა, რომ დაშავდა მათი ოპერატორი და ასევე, აქციის ზოგი მონაწილე.

პარტია მოქალაქეების ლიდერის, ალეკო ელისაშვილის თქმით, 17 აპრილს, კანცელარიასთან, პოლიციელები მას "გამეტებით ურტყამდნენ", შედეგად კი — ერთი ნეკნი აქვს მოტეხილი.

რუსული კანონის ქრონოლოგია:

2024 წლის 3 აპრილი

  • ოცნებამ განაცხადა, რომ ისევ აპირებს იმავე რუსული კანონის კანონის მიღებას, რამაც მასშტაბური სახალხო წინააღმდეგობა გამოიწვია გასული წლის მარტში.

8 აპრილი

ცნობილი გახდა, რომ რუსული კანონი პლენარულ სხდომაზე მესამე მოსმენით, სავარაუდოდ, 17 მაისს გავა.

  • პირველი მოსმენით პარლამენტმა კანონპროექტი 17 აპრილს მიიღო.