მოკლედ: პარლამენტში შესვლის საშუალებას ონლაინგამოცემების ჟურნალისტებს არ გვაძლევენ.

  • 30 წუთზე მეტია, ვცდილობთ შენობაში შესვლას, სადაც ამ წუთებში ბიუროს სხდომა იწყება.
  • სხდომაზე რუსული კანონის განხილვაა დაგეგმილი.

დეტალები: მედიის წარმომადგენლების ნაწილს, რომელიც პარლამენტის შენობის შესასვლელთან დგას, აქვს მუდმივი აკრედიტაციები საკანონმდებლო ორგანოში, ნაწილისთვის კი — დაშვებულია ერთჯერადი საშვები.

  • ამის მიუხედავად, დაცვის წევრები მათ პარლამენტის შენობაში არ უშვებენ.

ასევე, ნახეთ: რატომ არის ქართული ოცნების კანონი რუსული — მოკლედ და მარტივად

რა ხდება პარლამენტთან: უკანა შესასვლელთან, საიდანაც შენობაში პარლამენტის წევრები შედიან, საპროტესტო აქცია დაიწყო, სახელწოდებით — არა რუსულ კანონს, თავისუფლება ლაზარეს.

  • პარლამენტში რუსული კანონის განხილვის პარალელურად, დღეს საქალაქო სასამართლოში გაიმართება ლაზარე გრიგორიადისის საქმეზე დასკვნითი სხდომა. აქციის მონაწილეები მის გათავისუფლებასაც ითხოვენ.

ლაზარე გრიგორიადისის საქმეზე განაჩენი ცნობილი 28 მარტს უნდა გამხდარიყო, თუმცა მოსამართლე ზვიად შარაძემ დასკვნითი სასამართლო პროცესი გადადო.

რუსული კანონის შემობრუნება პარლამენტში: 3 აპრილს, ქართული ოცნების აღმასრულებელმა თავმჯდომარემ და უმრავლესობის ლიდერმა, მამუკა მდინარაძემ, განაცხადა, რომ ოცნება ისევ აპირებს, "უცხო აგენტად" გამოაცხადოს დამოუკიდებელი მედიასაშუალებები, რომელთა შემოსავლის 20%-ზე მეტის წყარო "უცხოური ძალაა", ანუ საგრანტო პროექტებია.

მდინარაძის თქმით, "კანონპროექტი საქართველოს პარლამენტში დაინიცირდება ზუსტად იმავე ტექსტით, როგორც შარშან იყო".

  • გასული, 2023 წლის მარტში ანალოგიური კანონპროექტის ინიციირებას საზოგადოება პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.
  • შემდეგ, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო.