მოკლედ: რამდენიმე წუთის წინ, აქციის მონაწილეებს აღმოსავლეთ ევროპის მრავალპარტიული დემოკრატიის ცენტრის აღმასრულებელი დირექტორმა, ლევან ცუცქირიძემ მოუწოდა, მშვიდობიანი მსვლელობით, მთავრობის ადმინისტრაციისკენ გადაენაცვლებინათ.

რა გეგმა აქვთ: "გვინდა შემოგთავაზოთ, რომ ახლა, ჩვენთან ერთად მშვიდობიანად, წყნარად წამოხვიდეთ სახელმწიფო კანცელარიასთან და მოვითხოვოთ, რომ გამოვიდეს პრემიერ-მინისტრი და დაგველაპარაკოს.

  • მოსწავლე ახალგაზრდობის სასახლესთან დაინახავთ გაშლილ 2 დიდ ბანერს, რომელსაც წინ წავუძღვებით და გთხოვთ, არავინ გასცდეთ ბანერს, გამოგვყევით მშვიდად, მშვიდობიანი, არაძალადობრივი კონსტიტუციური მსვლელობით", — თქვა ცუცქირიძემ.

მან, ასევე, აქციის მონაწილეებს მოუწოდა, არ აჰყვნენ პროვოკაციას და მშვიდობიანად მოითხოვონ კანცელარიასთან კანონის უკან გაწვევა და გუშინ, აქციის დროს დაკავებულების გათავისუფლება.

რა ხდება კანცელარიასთან: აქ დიდი რაოდენობით საპოლიციო ძალებია მობილიზებული.

  • შენობის შესასვლელთან დგას კრიმინალური პოლიცია.
  • უახლოეს წუთებში ადგილზე მივლენ აქციის მონაწილეები.

კანცელარიასთან იმყოფება საპატრულო პოლიციის დეპარტამენტის ხელმძღვანელი, ვაჟა სირაძეც.

"აქცია მიმდინარეობს მშვიდ ვითარებაში, არ სცდება შეკრებისა და მანიფესტაციების შესახებ კანონით დადგენილ ნორმებს, შესაბამისად, პოლიცია არის სტანდარტულად, მშვიდ რეჟიმში. იმ შემთხვევაში, თუ მოხდება რაიმე სახის სამართალდარღვევა, ძალადობა, კანონის შესაბამისად ვიმოქმედებთ.

  • ამ ეტაპისთვის [პოლიცია] დგას, არანაირი განკარგულება არ აქვს, გარდა ერთისა — დაიცვას კანონი, იმოქმედოს კანონის შესაბამისად და ყველა სამართალდარღვევაზე ჰქონდეს შესაბამისი რეაგირება", — თქვა სირაძემ.