მოკლედ: უცხოური გავლენის გამჭვირვალობის შესახებ კანონპროექტის განხილვას პარლამენტის იურიდიული კომიტეტი ორშაბათს, 15 აპრილს დაიწყებს.

  • თავდაპირველად, მისი განხილვა პარასკევს, 12 აპრილს იყო დაგეგმილი.

დეტალები: იურიდიული კომიტეტის თავმჯდომარემ, ანრი ოხანაშვილმა მიზეზად რეგლამენტი დაასახელა.

  • მისი თქმით, რეგლამენტი ითვალისწინებს, რომ განხილვა უნდა დაიწყოს არაუადრეს 3 დღისა. რადგან ხვალ დასვენების დღეა (9 აპრილი), უმრავლესობამ გადაწყვიტა, "არ დატოვონ სასპეკულაციო სივრცე" და ამიტომ, საკომიტეტო განხილვა მომდევნო კვირას, ორშაბათს დაიწყება.

კანონპროექტი დღეს, 8 აპრილს დარეგისტრირდა ბიუროს სხდომაზე.

  • პრეზიდენტის საპარლამენტო მდივანმა, გიორგი მსხილაძემ განაცხადა, რომ პრეზიდენტი კანონპროექტს ვეტოს დაადებს.
  • კანონპროექტს ეწინააღმდეგება ოპოზიციაც, რომელიც მიიჩნევს, რომ რუსული კანონი, მიღების შემთხვევაში, საქართველოს ევროინტეგრაციის პროცესს დაასრულებს.

ბიუროს სხდომის პარალელურად, პარლამენტის შენობასთან აქციაც გაიმართა.

ამასთან, რუსული კანონის წინააღმდეგ ხვალ 9 აპრილს თავისუფლების მარში იგეგმება.

კონტექსტი: 2024 წლის 3 აპრილს, ქართული ოცნების აღმასრულებელმა თავმჯდომარემ და უმრავლესობის ლიდერმა, მამუკა მდინარაძემ, განაცხადა, რომ ოცნება ისევ აპირებს, "უცხო აგენტად" გამოაცხადოს დამოუკიდებელი მედიასაშუალებები და არასამთავრობო ორგანიზაციები, რომელთა შემოსავლის 20%-ზე მეტის წყარო "უცხოური ძალაა", ანუ საგრანტო პროექტებია.

  • მდინარაძის თქმით, "კანონპროექტი საქართველოს პარლამენტში დაინიცირდება ზუსტად იმავე ტექსტით, როგორც შარშან იყო".
  • გასული, 2023 წლის მარტში ანალოგიური კანონპროექტის ინიციირებას საზოგადოება პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.
  • შემდეგ, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო.