მოკლედ: დღეს, 2024 წლის 8 აპრილს, პარლამენტმა ბიუროს სხდომაზე განიხილა რუსული კანონი.

  • ბიუროზე განხილვის შემდეგ, კანონპროექტი პარლამენტში ოფიციალურად დარეგისტრირდა, სახელწოდებით — უცხოური გავლენის გამჭვირვალობის შესახებ.
  • კანონპროექტის განხილვა იურიდიულ კომიტეტში გაგრძელდება.
  • რუსული კანონის ინიციატორი მმართველი პარტია, ქართული ოცნებაა.

პრეზიდენტი კანონს ვეტოს დაადებს: პარლამენტში პრეზიდენტის წარმომადგენელმა გიორგი მსხილაძემ განაცხადა, რომ პრეზიდენტი სალომე ზურაბიშვილი უცხოური გავლენის გამჭვირვალობის შესახებ კანონპროექტს ვეტოს დაადებს.

  • "ჩვენ ბიუროზე მოვითხოვეთ, რომ აღნიშნული კანონპროექტი საერთოდ არ გატარებულიყო რეგისტრაციაში, რათა არ დაწყებულიყო აღნიშნული კანონპროექტის კომიტეტებში განხილვა. ზოგადად, შეწყვეტილიყო ამ კანონზე საუბარი, რისი პირობაც შარშან დაიდო, რომ აღნიშნული კანონი პარლამენტში აღარ დაბრუნდებოდა. პრეზიდენტი, რა თქმა უნდა, გამოიყენებს თავის კონსტიტუციურ უფლებას და აღნიშნულ კანონს ვეტოს დაადებს", — თქვა მან.

ბიუროს სხდომა აქციის ფონზე მიმდინარეობდა: პარლამენტის შენობის მიმდებარე ტერიტორიაზე მოქალაქეებმა საპროტესტო აქცია იქამდე გამართეს, ვიდრე რუსული კანონის ბიუროზე მოსმენა დაიწყებოდა.

  • მოქალაქეები და სამოქალაქო აქტივისტები შეიკრიბნენ პარლამენტის უკანა შესასვლელთან.

მედიის ნაწილს პარლამენტიდან მუშაობის უფლება არ მიეცა: ონლაინგამოცემების ნაწილს, მათ შორის, On.ge-ს არ მიეცა საშუალება, შესულიყო პარლამენტის შენობაში.

  • პარლამენტში შესვლა ვერ შეძლო მედიასაშუალებების ვერც იმ წარმომადგენლებმა, ვისაც აკრედიტაციები აქვთ საკანონმდებლო ორგანოში საქმიანობისთვის, და ვერც მათ, ვისთვისაც დღეს, პარლამენტის პრესსამსახურმა, ერთჯერადი საშვი გასცა.

9 აპრილს თავისუფლების მარში დაანონსდა: თბილისში ხვალ, 9 აპრილს, რუსული კანონის წინააღმდეგ თავისუფლების მარში გაიმართება.

  • თავდაპირველად, დაგეგმილია მოქალაქეების შეკრება 18:00-ზე, რესპუბლიკის მოედანთან;
  • შემდეგ მსვლელობა საქართველოს პარლამენტის მიმართულებით გაგრძელდება.

თავისუფლების მარშის ძირითადი გზავნილებია:

  • ევროპული მომავლისთვის!;
  • ჩვენ ვირჩევთ ევროპას, საქართველო არასდროს იქნება რუსეთი!;
  • ერთად დავიცვათ 9 აპრილის მონაპოვარი!;
  • კი ევროპას! არა რუსულ კანონს.

გაიგე მეტი: რატომ არის ქართული ოცნების კანონი რუსული — მოკლედ და მარტივად