პუტინის ხელისუფლების პროპაგანდისტ ტელეჟურნალისტ ვლადიმერ სოლოვიოვს უკრაინა საერთაშორისო ძებნაში გამოაცხადებს. ამის შესახებ ინფორმაციას უკრაინის სახელმწიფო საგამოძიებო ბიურო ავრცელებს.

მათი ცნობით, ლვოვის რაიონულმა სასამართლომ გამომძიებლის მოთხოვნა დააკმაყოფილა და აღკვეთის ღონისძიების სახით პატიმრობა შეუფარდა.

ბიურომ დაადგინა, რომ ვოლოდიმირ სოლოვიოვი სისტემატურად უჭერდა მხარს რუსეთის უმაღლესი ხელმძღვანელობის დანაშაულებრივ ქმედებებს უკრაინაში შეჭრის მიზნით და მოითხოვდა მისი ტერიტორიული მთლიანობის შეცვლას, მათ შორის სამხედრო ოპერაციებისა და ინფრასტრუქტურის და მშვიდობიანი მოსახლეობის განადგურების გზით.

მათივე ინფორმაციით, გამომძიებლებმა შეაგროვეს დოკუმენტების საჭირო პაკეტი სოლოვიოვის საერთაშორისო ძებნილთა სიაში შესაყვანად, რომელიც მალე უცხოელ კოლეგებს გაუგზავნიან.

სოლოვიოვი რუსეთის საგარეო საქმეთა სამინისტროს სპიკერთან, მარია ზახაროვასთან და RT-ის ხელმძღვანელ მარგარიტა სიმონიანთან ერთად ევროკავშირის მიერ სანქცირებულთა სიაშია.

ამას გარდა, 11 მარტს უკრაინის გენერალურმა პროკურორმა განაცხადა, რომ უკრაინის პროკურატურა გეგმავს, უახლოეს დღეებში დააინიციროს მარგარიტა სიმონიანის საერთაშორისო ძებნილად გამოცხადების პროცესი.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში