სპეციალური პენიტენციური სამსახური "ცრუ ინფორმაციას“ უწოდებს ერთიანი ნაციონალური მოძრაობის პოლიტიკური საბჭოს წევრის და ყოფილი გენპროკურორი მურთაზ ზოდელავას ინსულტის შესახებ გავრცელებულ ცნობებს.

"სპეციალური პენიტენციური სამსახური ეხმაურება მსჯავრდებულ მურთაზ ზოდელავასთან დაკავშირებით გავრცელებულ ცრუ ინფორმაციას და განმარტავს, რომ
მსჯაავრდებულს ინსულტი არ გადაუტანია.

მსჯავრდებულ მურთაზ ზოდელავას მიერ წარმოდგენილი ჩივილების შესაბამისად, იგი გადაყვანილ იქნა კლინიკა ვივამედში დიაგნოზის დასმის მიზნით, კლინიკაში ჩატარებული კვლევების შედეგად ყველა სახის მწვავე პათოლოგიური პროცესი გამოირიცხა.

მიუხედავად მსჯავრდებულის მოთხოვნისა, რომ დაბრუნებულიყო პენიტენციურ დაწესებულებაში, იგი მოთავსებულ იქნა კლინიკაში შემდგომი დინამიკური დაკვირვების მიზნით," — წერს სამსახური.

ცოტა ხნის წინ, საქართველოს მე-3 პრეზიდენტმა, მიხეილ სააკაშვილმა სოციალურ ქსელში დაწერა, რომ 4 ოქტომბრის საქმეზე მსაჯვრდებულმა მურთაზ ზოდელავამ "საკანში ინსულტი ორჯერ გადაიტანა".

"ჩვენი თანამებრძოლი და უბრალოდ ძალიან კარგი ადამიანი, მურთაზ ზოდელავა სასწრაფოდ გადაიყვანეს "ვივამედში" ჯანმრთელობის მძიმე მდგომარეობის გამო.
გაირკვა, რომ მან ჩემს გვერდით საკანში, ორჯერ გადაიტანა ინსულტი. ის რომ მის სიცოცხლეს საფრთხე ემუქრება, ყოველთვის იყო ცნობილი ადგილობრივი ჯალათებისთვის. ციხის მედ პერსონალი და ციხის ზოგიერთი თანამშრომელი ტეხავდნენ განგაშს, მაგრამ მათი თბილისელი უფროსები დემონსტრაციულად აიგნორებდნენ ამ საფრთხეს.
მურთაზის ისტორია, ის რომ ასაკში მყოფი პაატა ბურჭულაძე ასევე უსამართლოდ ჰყავთ გამოკეტილი, ნათლად აჩვენებს, რომ რეჟიმი მზადაა წავიდეს ოპონენტების ფიზიკურ განადგურებაზე "ნულოვანი ემპათიის" და სინამდვილეში რუსული დაუნდობლობის გამოხატულებაა," — წერს სააკაშვილი.

"ვივამედის" კლინიკური დირექტორმა, ზურაბ ჩხაიძემ IPN-ს განუცხადა, რომ ზოდელავა კლინიკაში თავბრუსხვევით სამი დღის წინ შეიყვანეს. ჩხაიძემ განაცხადა, რომ "ინსულტზე საუბარი არ არის".

"ჩვენთან იმყოფება ნამდვილად სტაციონარულ მკურნალობაზე. მდგომარეობა დამაკმაყოფილებელია, მაგრამ სხვა დიაგნოზის შესახებ ვერაფერს გეტყვით, იმიტომ, რომ პირადი ინფორმაციაა და გასაჯაროების უფლება არ მაქვს. შემოსულია თავბრუსხვევით, ინსულტზე არ არის საუბარი. ჩატარებული აქვს ყველა საჭირო და აუცილებელი კვლევა," — განაცხადა ზურაბ ჩხაიძემ.

შეგახსენებთ, 4 ოქტომბრის საქმის ორგანიზატორებად მიჩნეული პაატა ბურჭულაძე, მურთაზ ზოდელავა, ლაშა ბერიძე, ირაკლი ნადირაძე, პაატა მანჯგალაძე, ირაკლი შაიშმელაშვილი, თორნიკე მჭედლიშვილი, ნიკა გვენცაძე, ირაკლი ჩხვირკია და გური ჟვანია სასამართლომ დამნაშავედ ცნო. ზოდელავას 7 წლით თავისუფლების აღკვეთა მიესაჯა.

გარდა 4 ოქტომბრის საქმისა, მურთაზ ზოდელავას ლევან ხაბეიშვილის ინციდენტზეც 9-თვიანი პატიმრობა აქვს შეფარდებული. ზოდელავა ერთიანი ნაციონალური მოძრაობის ლიდერთან ერთად 2025 წლის 11 სექტმბერს დააკავეს. ზოდელავას გამოძიებისთვის ხელის შეშლა ედებოდა ბრალად და საპატიმრო მალევე გირაოს სანაცვლოდ დატოვა.